له پېښو سره د مبارزې آمادګۍ ملي ادارې او د اکټیډ موسسې ترمنځ د ۶۹۶,۹۵۹ ډالرو په ارزښت د ګډو همکاریو تفاهم نامه لاسلیک شوه
نن د سهشنبې سهار، له پېښو سره د مبارزې آمادګۍ ملي ادارې سرپرست الحاج ملا نورالدین ترابي، د اکټیډ نړیوالې موسسې له رئیسې الکسانډرا ایواس او د هغې له مل پلاوي سره په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
په دې ناسته کې، محترم ترابي صاحب د ښه راغلاست ترڅنګ ټینګار وکړ چې د دې ادارې اساسي موخه د خلکو لپاره د غوره خدماتو وړاندې کول او د زیانمنو کسانو لپاره د زیاتو مرستو رسول ده. نوموړي زیاته کړه چې دوی نه یوازې د مرستندویه مؤسسو ملاتړ کوي، بلکې هغوی هڅوي تر څو د زیانمنو کسانو سره د مرستو او د هغوی د ستونزو د حل لپاره لا زیاته بودجه ځانګړې کړي. همداراز، نوموړي د مرستو د شفافیت او د ویش بهیر د چټکتیا پر اړتیا ټینګار وکړ، تر څو مرستې مستحقو کسانو ته په سمه توګه ورسیږي.
ورپسې، د اکتید نړیوالې موسسې رئیسې، الکسانډرا ایواس، له پېښو سره د مبارزې آمادګۍ ملي ادارې له سرپرست څخه د همکاریو له امله مننه وکړه او د دې پروژې په اړه یې توضیحات وړاندې کړل. نوموړې وویل چې دغه پروژه د AHF دفتر په مالي ملاتړ او د اکټیډ موسسې لخوا د ۶۹۶,۹۵۹ ډالرو په ارزښت پلي کېږي. په دې مرستو کې به، د بدخشان ولایت په څلورو ولسوالیو کې د سیلابونو او نورو طبیعي پېښو له امله زیانمنو شویو ۲,۹۷۲ کورنیو ته نغدي مرستې ووېشل شي.
د یادونې وړ ده، چې د دې تفاهم نامې له مخې به، د ۶۹۶,۹۵۹ ډالرو په ارزښت، د بدخشان ولایت د ارګو، دراییم، یاوان او کوهستان ولسوالیو ۲,۹۷۲ زیانمنو کورنیو ته نغدي مرستې وېشل کېږي، چې هرې کورنۍ ته به ۱۷۰ ډالره په څلورو قسطونو کې ووېشل شي.
نېټه:۱۴۴۶/۹/۱۱
له پېښو سره د مبارزې آمادګۍ ملي اداره
