د کابل ولایت له پېښو سره د مبارزې آمادګۍ ریاست د کابل په ښار کې د ۶۷۱ کورنیو لپاره د نغدي مرستو د وېش لړۍ پیل کړه
د کابل ولایت له پېښو سره د مبارزې آمادګۍ ریاست د ژغورنې نړیوالې کمېټې IRC په مالي ملاتړ، د کابل ښار په بېلابېلو ناحیو کې د پېښو له امله ۶۷۱ زیانمنو اړمنو کورنیو لپاره د نغدي مرستو د وېش لړۍ پیل کړه.
په دې پروسه کې، د کابل ولایت له پېښو سره د مبارزې آمادګۍ رییس الحاج مولوي نجیب الله انوري، د IRC موسسې څخه د مننې او قدردانۍ په ترڅ کې وویل: نن ورځ له سروې وروسته، 671 کورنیو هرې کورنۍ ته د ژمي د سون توکو او جامو پېرلو لپاره 5400 افغانۍ نغدې پیسې ووېشل شي.
مولوي صاحب انوري زیاته کړه چې د مرستو وېش له پېښو سره د مبارزې آمادګۍ ملي ادارې او د IRC موسسې ترمنځ د لاسلیک شوي هوکړه لیک له مخې او د اسلامي امارت د قوانینو او مقرراتو په چوکاټ کې ترسره کېږي. هغه د IRC موسسې څخه د مننې ترڅنګ، له ټولو موسسو څخه غوښتنه وکړه چې خپلې مرستې زیاتې او دوامداره کړي، او ټینګار یې وکړ چې د کابل ولایت له پېښو سره د مبارزې آمادګۍ ریاست د اسلامي امارت د قوانینو سره سم د همکاریو لپاره چمتو دی.
په پای کې، د مرستو اخیستونکو کورنیو د IRC موسسې او د کابل ولایت له پېښو سره د مبارزې آمادګۍ ریاست له دې ګام څخه مننه او خوښي څرګنده کړه.
نېټه:۱۴۴۶/۵/۲۹
له پېښو سره د مبارزې آمادګۍ ملي اداره
