پېښو ته د رسېدو په چارو کې د دولت وزیر کاپیسا ولایت ته ورسېد
کاپیسا- د تلې ۱۷مه-۱۴۰۱
الحاج ملا محمد عباس آخند پېښو ته د رسېدو په چارو کې د دولت وزیر، پداسې حال کې چې الحاج مولوي شمس الدین حقیار د نړیوالو اړیکو رییس، شفیع الله رحیمی د اطلاعاتو او عامه اړیکو رییس او سید محمود صدام د تدارکاتو آمر یې ملتیا کوله د وروستیو سیلابونو له امله زیانمن شویو سره د خواښوږۍ او هغوۍ ته د رسېدنې لپاره کاپیسا ولایت سفر وکړ او د قاری احسان الله بریال د کاپیسا ولایت والي، مولوي ضیاالحق د امنیه قومندان، مولوي محمد صابر د پېښو سره مبارزې رییس او قاری صفی الله حافظ د یاد ولایت د امنیت رییس سره یې وکتل.
په دې لیدنه کې د کاپیسا ولایت والي د ښه راغلاست ترڅنګ په هیواد کې، په ځانګړي توګه په کاپیسا ولایت کې رامنځته شویو پر وروستیو سیلابونو باندې خبرې وکړې او د سیلاب ځپلو لپاره پېښو ته د رسېدو په چارو کې د دولت وزارت له پر وخته فعالیتونو او رسیدنې څخه مننه وکړه.
وروسته الحاج ملا محمد عباس آخند پېښو ته د رسېدو په چارو کې د دولت وزیر، د زیانمن شویو سره په همدردۍ سره ووېل: ۱۱ قلمه خوراکي او غیرخوراکي توکي چې، اوړه، غوړي، بسکېټ، مګي آش، مربا، څپلکې، جامې، غنم، د حبوباتو کنسر او چپس په کې شامل دي د ۱۰۰۰ کورنیو لپاره دغه ولایت ته رالېږل شوي دي.
نوموړي د کاپیسا ولایت پېښو سره د مبارزې ریاست څخه وغوښتل ترڅو د زیانمن شویو سیمو څخه کره سروې ترتیب کړي او د نورو اجرااتو لپاره دي مرکز ته ولېږل شي.
