په کابل کې مېشت د قزاقستان جمهوریت سفیر: قزاقستان د افغانستان لپاره د بشردوستانه مرستو د همکارۍ لپاره چمتو دی

کابل- 9 قوس 1400 / 24 ربیع‌الثانی 1443
ښاغلي غلام غوث ناصري پېښو ته د رسېدو په چارو کې د دولت وزارت مرستیال او سرپرست، نن سهار په کابل کې مېشت د قزاقستان جمهوریت سفیر علیم خان یسین ګیلدییف سره لیدنه او افغانستان ته د بشري مرستو په برخه کې د هغه هېواد په ژمنو خبرې وکړې.
لومړۍ ښاغلي ناصري په تېرو کالو کې د قزاقستان جمهوریت د سخاوتمندانه مرستو څخه مننه وکړه او په افغانستان کې یې د هغه هېواد د بشري مرستو په برخه کې رول مهم وباله.
پېښو ته د رسېدو په چارو کې د دولت وزارت سرپرست په افغانستان کې د بشري وضعیت په اړه خبرې وکړې او زیاته کړه چې په روان کال کې د جګړې او طبیعي پېښو ترڅنګ د بارانونو کمښت او راتلونکي ژمي د خلکو زیانمنتوب زیات کړی او د قزاقستان جمهوریت له سفیر څخه یې خوراکي او غیر خوراکي بشري مرستې او د کارکونکو د ظرفیت لوړلو په پار د روزنیزو پروګرامونو د ترسره کولو غوښتونکې شو.
ورسته علیم خان یسین ګلدییف په کابل کې مېشت د قزاقستان جمهوریت سفیر، پېښو ته د رسېدو په چارو کې د دولت وزیر څخه یې د هغه دفتر ته له دعوت په پار تشکري وکړه او په تېرو کالو کې یې د افغانستان لپاره په بشري او پرمختیايي برخو کې د هغه هېواد له مرستو یادونه وکړه او ژمنه یې وکړه چې د قزاقستان هېواد د افغانستان اسلامي امارت سره د هر ډول همکاري لپاره چمتو دی.
په آخیره کې دواړو لورو د دواړو دوست هېوادونو په دوامداره همکاریو او دوستي خبرې وکړې، او د دواړو هېوادونو په همکاریو یې ټینګار وکړ.