په واشېر ولسوالۍ کي د ۳۰۰ سیلاب ځپلو او بې وزلو کورنیو سره د خوراکي توکو مرسته وسوه
تېر ورځ د هلمند ولایت په واشېر ولسوالۍ کي د طبیعي پیښو پر وړاندي د مبارزې ریاست له لوري د ۳۰۰ سیلاب ځپلو او اړمنو کورنیو سره د خوراکي توکو مرسته ترسره سوه.
د طبیعي پیښو پر وړاندي د مبارزې رئیس محترم الحاج قاري عبدالباري فیاض د باختر آژانس سره د خبرو پر مهال وویل چي د طبیعي پیښو پر وړاندي د مبارزې ریاست له لوري د واشېر ولسوالۍ سیاپشتې په سیمه کي د ۳۰۰ سیلاب ځپلو او اړمنو کورنیو سره د یوې او دوو بوجیو اوړو مرسته وکړه.
ښاغلي فیاض زیاته کړه چي د دا ډول مرستو څخه یې موخه د بې وزلۍ او فقر له منځه وړل دي.
د هلمند واشېر ولسوالۍ سیلاب ځپلو کورنیو د یادي مرستي په ورکړه خوښي وښوده او وویل چي په دې سره به یې یوه اندازه ستونزي حل سي خو دوی له ولایتي ادارې او اړوند مؤسساتو څخه د نورو مرستو د ورکړي غوښتنه هم وکړه.
