له پېښو سره د مبارزې آمادګۍ ملي ادارې سرپرست د کابل ښار په یوولسمه ناحیه کې د ماینونو او ناچاودو توکو د قربانیانو لپاره د تفریحي پارک، کتابتون او د یادګاري منار د جوړېدو له بهیر څخه څارنه وکړه

نن ورځ د پنج شنبې په سهار، له پېښو سره د مبارزې آمادګۍ ملي ادارې سرپرست؛ الحاج ملا نورالدین ترابي، د ماین پاکۍ چارو د انسجام او همغږۍ له رییس؛ قاري نورالدین رستم خیل سره یوځای د کابل ښار د یولسمې ناحیې په ګولای پارک سیمه کې د ماینونو او ناچاودو توکو د قربانیانو په یاد کې د تفریحي پارک، کتابتون او منار د جوړولو له بهیر څخه لیدنه وکړه.
محترم ترابي صاحب، پارک ته د خپل سفر په جریان کې وویل چې ماینونه اوس د انسانیت د پټ دښمن په توګه پیژندل کېږي او په افغانستان کې یې خلکو ته ډېر تلفات اړولي دي. هغه زیاته کړه، چې موږ د یو مسؤل بنسټ په توګه تل هڅه کوو، چې افغانستان له ماینونو او ناچاودو توکو څخه پاک کړو.
نوموړي وویل، چې د ماینونو د قربانیانو د تسلیت لپاره به په دې تفریحي پارک کې د ماینونو او ناچاودو توکو د قربانیانو د یادګار منار او کتابتون جوړ شي چې موږ به یې د جوړولو له چارو څخه په دوامداره توګه څارنه کوو.
د یادولو وړ ده، چې دا پارک د ماین پاکۍ د انسجام او همغږۍ ریاست د دې ادارې او د ماین پاکۍ د همکارو موسسو په همغږۍ د جوړېدو په حال کې دی، چې کار یې شاوخوا ٨٥ % بشپړ شوی دی او ډیر ژر به پرانیستل او ګټې اخیستنې ته وسپارل شي.

نیټه: ۱۴۴۶/۱۲/۲۹ هـ ق
له پېښو د مبارزې آمادګۍ ملي اداره