له پېښو سره د مبارزې آمادګۍ ملي ادارې سرپرست د افغانستان لپاره د ملګرو ملتونو د بشري مرستو د همغږۍ دفتر (UN-OCHA) له عمومي رئیس سره وکتل

کابل-۲۴ صفرالمظفر ۱۴۴۶
له پېښو سره د مبارزې آمادګۍ ملي ادارې سرپرست محترم الحاج ملا نورالدین ترابي نن سهار په خپل کارې دفتر کې د افغانستان لپاره د ملګرو ملتونو د بشري مرستو د همغږۍ دفتر (UN-OCHA) له عمومي رئیسې اغلې ازابیل مورساد کارلسن سره وکتل او خبرې یې وکړې.
په دې ناسته کې چې د هېواد د پېښو د مدیریت او اغېزمنو خلکو د رسیدګي په اړه بحث وسو، ښاغلې ترابي صاحب وویل چې موږ د پېښو د مدیریت په برخه کې د خلکو د اړتیاوو یولېست ترتیب کړی دی. په دې کې د پېښو اغېزمنو خلګو ته عاجله رسېدنه، د مرکزي او ولایتي دفترونو په اړینو وسایلو سمبالول او د پېښو له خطرونو څخه د مخنیوي پروژو پلي کول شامل دي.ښاغلې ترابي صاحب له اغلې ازابیل څخه غوښتنه وکړه چې د خپلې کاري پالیسۍ سره سم په دې اړتیاوو کې همکاري وکړي. 
هغه همدا راز یادونه وکړه چې د کندهار په څو ولسوالیو کې سختو طوفانونو د زراعتي ځمکو او کورونو ترڅنګ، له ۵۰۰۰ څخه زیات سولرونه له منځه وړي دي او له هغې څخه یې غوښتنه وکړه چې په دې برخه کې له اغېزمنو خلکو سره مرسته وکړي.
په همدې حال کې اغلې ازابیل وویل چې اوچا دفتر یوه همغږه کوونکې اداره ده او د  هغه بېلابېلوسکتورونو سره همغږي لرې چې په بشردوستانه چارو کې کار کوي. اغلې ازابیل مورساد زیاته کړه چې د کندهار د طوفان په اړه یې یو راپور ترتیب کړی او هغه یې هغو نیمه پرمختیایي سکتورونو ته استولې دې  چې له دوی سره همکاري کوې، ترڅو هغوی د دې پېښې اغېزمنو خلګو سره د مرستې په برخه کې اقدام وکړي.
اغلې ازابیل خپل کاري پلانونه هم له ادارې مقام سره شریک کړل او وویل چې موږ د خلکو د اړتیاوو پر بنسټ پلانونه جوړوو او خپلې مرستې ترسره کوو. زموږ هڅه دا ده چې خپلې همغږۍ تر ولسوالیو پورې پراخه کړو.
په پای کې، دواړو لورو د دوامدارو اړیکو او په راتلونکو برنامو کې د ګډې همکارۍ پر اهمیت ټینګار وکړ. له پېښو سره د مبارزې آمادګۍ ملي ادارې سرپرست ژمنه وکړه چې موسسو ته ټولې اړینې آسانتیاوې برابرې کړي او د هغوی کارونه به پر وخت ترسره کړئ.