د چاریکار ښار د شپږمې ناحیې د خوړ سیمې له شګو او خټو څخه پاکې شوې
د سېلابي سیمو د پاکولو د پروګرام په دوام، د پروان ولایت له پېښو سره د مبارزې آمادګۍ ریاست د چاریکار ښار د شپږمې ناحیې هغه سیمې چې تر ګواښ لاندې او زیانمنونکې وې، له شګو او خټو څخه پاکې کړې. د دې پروژې د چارو څارنه د یاد ریاست د رئیس مولوي عبدالعلیم افضلي په مشرۍ ټاکل شوي پلاوي وکړه.
د پروان ولایت له پېښو سره د مبارزې آمادګۍ ریاست وايي، چې دا پروګرام به د دې ولایت په نورو ولسوالیو کې هم د کمېټې د غړو ریاستونو په همکارۍ، چې درنې ماشینرۍ لري دوام ومومي.
د مسؤلینو په وینا، د دې پروسې پلي کېدل د سېلابونو د ښه مدیریت، د هغوی له امله د رامنځته کېدونکو خطرونو د کمولو، د ځاني تلفاتو او مالي زیانونو د مخنیوي، او د ښاریانو د لا زیات خوندیتوب د رامنځته کولو لپاره یو اغېزمن ګام بلل کېږي.
نېټه:۱۴۴۷/۷/۲ هـ ق
له پېښو سره د مبارزې آمادګۍ ملي اداره
