د بغلان ولایت له پېښو سره د مبارزې آمادګۍ ریاست په دوشي ولسوالۍ کې د استنادي دیوال جوړولو د پروژې کار پیل کړ
له پېښو سره د مبارزې آمادګۍ ادارې او د هستوګنې لپاره د آغاخان موسسې (AKAH) ترمنځ د لاسلیک شوي هوکړهلیک پر بنسټ، د بغلان ولایت له پېښو سره د مبارزې آمادګۍ ریاست، د یاد ولایت د دوشي ولسوالۍ په زراغه کلي کې د استنادي دیوال جوړولو د پروژې کار رسماً پیل کړ.
د پروژې د پرانیستې مراسم د بغلان ولایت له پېښو سره د مبارزې آمادګۍ ریاست د مسؤلینو، سیمه ییزو مسؤلینو، قومي مشرانو، ځوانانو او د سیمې د ګڼ شمېر اوسېدونکو په ګډون ترسره شول. ګډونوالو دغه پروژه د سېلابونو د خطرونو د کمولو او د خلکو د ژوند او شتمنیو د خونديتوب لپاره مهم ګام وباله.
یاده پروژه د دوه میلیونه او دوه لکه (۲٫۲۰۰٫۰۰۰) افغانیو په لګښت پلې کېږي. د پروژې په بشپړېدو سره به د سېلابونو له امله احتمالي زیانونه د پام وړ راکم شي او شاوخوا له ۱۸۵ څخه تر ۲۰۰ کورنۍ، کرنیزې ځمکې، سړکونه او نور عامه تاسیسات به د سېلابونو له خطرونو څخه خوندي شي.
د سیمې اوسېدونکو د بغلان ولایت له پېښو سره د مبارزې آمادګۍ ریاست او د آغاخان (AKAH) موسسې له هڅو او خدمتونو څخه مننه وکړه او غوښتنه یې وکړه چې د خطرونو د کمولو ورته وقایوي پروژې دې د ولایت په نورو له خطر سره مخ سیمو کې هم عملي شي.
د بغلان ولایت له پېښو سره د مبارزې آمادګۍ ریاست مسؤلینو وویل، چې د قدرتي پېښو د خطرونو کمول، د ټولنو د خوندیتوب کچې لوړول او له خطر سره د مخ سیمو ساتنه د دې ادارې له مهمو لومړیتوبونو څخه دي، او په همدې موخه به د همکارو مؤسسو په همغږۍ د وقایوي او پراختیایي پروژو پلي کول دوام ولري.
