له پېښو سره د مبارزې آمادګۍ ملي ادارې سرپرست د زابل ولایت له پېښو سره د مبارزې آمادګۍ ریاست څخه لیدنه وکړه
نن ورځ دو شنبه، له پېښو سره د مبارزې آمادګۍ ملي ادارې سرپرست محترم الحاج ملا نورالدین ترابي، زابل ولایت ته سفر وکړ او د یاد ولایت له پېښو سره د مبارزې آمادګۍ ریاست څخه یې لیدنه وکړه او له کارونو یې د څارنې په ترڅ کې د یاد ریاست د تقنینی او نورو رسمي اسنادو د دوسیو د فایلینګ سیسټم تر نظر تېر کړ.
محترم ترابي صاحب د یاد ریاست له هر کارکوونکي سره په جلا جلا توګه وکتل او د هغوی وړاندیزونه، مشورې او ستونزې یې واورېدې او د حل لپاره یې د همکارۍ ډاډ ورکړ.
نوموړي د یاد ریاست کارکوونکي اړمنو خلکو ته پر وخت او اغېزمنو خدمتونو وړاندې کولو ته وهڅول او هغوی ته یې ووېل چې د مراجعینو سره نیک چلند، د کارونو پر وخت او بې له ځنډه ترسره کول، د بیت المال په سمه توګه کارول او اداري اصول مراعاتول باید په جدي توګه پام کې ونیسي. همداراز، نوموړي له هغوی وغوښتل چې د ولس ریښتیني خدمت کوونکي واوسي او د هېواد د پرمختګ او ښېرازۍ لپاره خپله ټوله انرژي او مسلکي پوهه په سمه توګه وکاروي.
همداراز، له پېښو سره د مبارزې آمادګۍ ملي ادارې سرپرست په زابل ولایت کې د یادې ادارې له ګودام څخه هم لیدنه وکړه، او د خوراکي او غیرخوراکي توکو د ساتنې، د توکو د ترتیب برابرولو، نظم رامنځته کولو، او اړتیاوو ته په کتو اړمنو کسانو ته د اړینو توکو د وېش په اړه یې اړونده مسؤلینو ته لازمې لارښوونې وکړې.
په پای کې، د زابل ولایت له پېښو سره د مبارزې آمادګۍ ریاست کارکوونکو د ادارې له سرپرست څخه د دوی د حال احوال اخیستلو او د ستونزو د اورېدو له امله مننه وکړه. همداراز، هغوی ډاډ ورکړ چې د ادارې د مشرتابه د لارښوونو او پریکړو سره سم خپل کاري پلانونه به لا په ښه توګه عملي کړي.
نېټه:۱۴۴۶/۱۰/۰۹
له پېښو سره د مبارزې آمادګۍ ملي اداره
