د بغلان ولایت له پېښو سره د مبارزې آمادګۍ ریاست ٣٣٢ زیانمنو کورنیو ته غیر خوراکي مرستې ووېشلې

د بغلان ولایت له پېښو سره د مبارزې آمادګۍ ریاست، د ملک سلمان بشردوستانه مرکز په مالي ملاتړ, د ORCD مؤسسې له لارې، ٣٣٢ کورنیو ته چې د سېلابونو له امله د یاد ولایت په بغلان مرکزي او دوشي ولسوالیو او د پلخمري ښار په ناحیو کې زیانمنې شوې وې، له سروې وروسته یادو کورنیو ته غیر خوراکي مرستې ووېشلې. 
په دې لړۍ کې له پېښو سره د مبارزې آمادګۍ ریاست او د ملک سلمان بشردوستانه مرکز د استازو په شتون کې، هرې کورنۍ ته ٢١ قلمه غیر خوراکي توکي، چې خېمه، کمپله، پلاستیکي فرش، د اوبو سطل، د اوبو بوشکه او یوه بسته د آشپزخانې وسایل پکې شامل وو, ووېشل شول. 
د یادونې ده چې د ملک سلمان بشردوستانه مرکز، د هېواد په کچه له پېښو سره د مبارزې آمادګۍ ریاستونو سره په همغږۍ، زیانمنو او کډوالو کورنیو ته بشردوستانه مرستې وېشلې دي. 
 ورته مهال د مرستو ترلاسه کوونکو له یاد ریاست او د ملک سلمان له بشردوستانه مرکز څخه د مننې ترڅنګ مسؤلینو ته د خیر دعا وکړه.

نېټه: ١٤٤٦/٦/٢٧
له پېښو سره د مبارزې آمادګۍ ملي اداره