د کاپیسا ولایت له پېښو سره د مبارزې آمادګۍ ریاست په مرکز کې د ښوېېدو له ګواښ سره مخ ۱۸ لویې خطرناکې ډبرې وېجاړې کړې
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي په لارښوونه، د کاپیسا ولایت له پېښو سره د مبارزې آمادګۍ ریاست د دې ولایت د مرکز اړوند په الیاسخېل کلي کې د ښوېېدو له ګواښ سره مخ د لویو ډبرو د ویجاړولو او د خطر له منځه وړلو چارې په بریالیتوب سره بشپړې کړې.
د ډبرو ویجاړولو عملیات د یاد ریاست د تخنیکي او بېړنیو ټیمونو له لوري ترسره شول، چې په ترڅ کې یې په درېیو بېلابېلو لوړو او ناپایدارو سیمو کې موقعیت لرونکې ټولټال ۱۸ لویې ډبرې د تخنیکي معیارونو له مخې ویجاړې شوې.
د یادو ډبرو شتون د سیمې د اوسېدونکو ژوند، استوګنیزو کورونو، عامه تاسیساتو او مواصلاتي لارو لپاره جدي ګواښ بلل کېده، خو د دغې وقایوي پروژې په بشپړېدو سره د دبرو د ښویېدو خطر په بشپړه توګه رفع شو.
د کاپیسا ولایت له پېښو سره د مبارزې آمادګۍ ریاست مسؤلینو، د پروژې له ساحې څخه لیدنه او د سیمې له اوسېدونکو سره یې خبرې وکړې او ویې ویل چې دغه اقدام د قدرتي پېښو د خطر کمولو د پروګرامونو په چوکاټ کې د خلکو د ځان او مال د خوندیتوب په موخه ترسره شوی او هڅه کوي چې په زیانمنونکو سیمو کې ورته وقایوي پروژې دوام ومومي.
د سیمې اوسېدونکو هم د دغې پروژې له بشپړېدو خوښي څرګنده کړه او ویې ویل، هغه سترې ډبرې چې د اوږدې مودې راهیسې د کورونو، عامه تاسیساتو او سړکونو لپاره جدي ګواښ وې، اوس یې خطر له منځه تللی دی. همدارنګه خلکو له پېښو سره د مبارزې آمادګۍ ادارې له هڅو مننه او قدرداني وکړه.
