د غزني ولایت له پېښو سره د مبارزې آمادګۍ ریاست د مرکز په نوغي سیمه کې د یوه کاریز د پاکولو کار پیل کړ
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي د لارښوونې پر بنسټ، د غزني ولایت له پېښو سره د مبارزې آمادګۍ ریاست، د یاد ولایت د مرکز په ده اګاه کلا، کفتان کلا او ښکته نوغي کلیو کې د یوه کاریز د پاکولو کار پیل کړ.
یاد کاریز له کلونو راهیسې د شګو، خاورو او رسوباتو د راټولېدو له امله بند شوی و او د سیمې د اوسېدونکو لپاره یې ګڼې ستونزې رامنځته کړې وې. په دې پروژه کې به د ۲۵۰۰ متره په اوږدوالي یو کاریز پاک شي.
د دغې پروژې په بشپړېدو سره به سلګونو کورنیو ته د څښاک پاکې اوبه برابرې شي او همدارنګه د سلګونه جریبه کرنیزو ځمکو او باغونو د خړوبولو لپاره به د اوبو رسونې زمینه برابره شي، چې په دې سره به د کرنیزو حاصلاتو په زیاتوالي، د خلکو د ژوند په شرایطو کې ښه والی رامنځته شي.
د یادونې وړ ده، چې د یاد کاریز د پاکولو چارې د «کار په بدل کې د خوراکي توکو» پروګرام له لارې ترسره کېږي او د پروژې په جریان کې به کاریګرو ته د غزني ولایت له پېښو سره د مبارزې آمادګۍ ریاست له لوري خوراکي توکي ووېشل شي.
