د کونړ ولایت له پېښو سره د مبارزې آمادګۍ ریاست په چپه دره ولسوالۍ کې تړلې لارې بېرته پرانیستې
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي، د لارښوونې پر بنسټ، د کونړ ولایت له پېښو سره د مبارزې آمادګۍ ریاست د قدرتي پېښو له امله د رامنځته کېدونکو خطرونو د کمولو، د عامه زیربناوو د ساتنې او د خلکو د تګ راتګ د اسانتیا په موخه، په چپه دره ولسوالۍ کې د مانده، ویالو او سېلابي لارو د پاکولو او د زیانمنو شویو سړکونو د بېرته پرانیستلو چارې پیل کړې دي.
دغه عملیات، چې د یکشنبې له ورځې پیل شوي، د کلاچي، چومبرک، ګوشلام، ورسک، نیګاه او مرخنیو سیمې یې تر پوښښ لاندې نیولي او په کې د مانده، ویالو، او د سېلابي اوبو د تېرېدو لارو پاکول شامل دي.
د دغو اقداماتو په ترڅ کې، د چپې درې ولسوالۍ له مرکز څخه تر بهادر کلي پورې هغه سړک، چې د وروستیو سېلابونو له امله د خټو، ډبرو او رسوباتو له امله تړل شوی و، د درنو ماشینونو په وسیله پاک او بېرته د خلکو پر مخ پرانیستل شو.
د کونړ ولایت له پېښو سره د مبارزې آمادګۍ رئیس، مولوي محمد مبین مفتون عمر، هم ټینګار وکړ چې د یادو اقداماتو ترڅنګ، د ولایت په نورو ولسوالیو کې د وقایوي پروژو پلي کول هم دوام لري، څو د قدرتي پېښو له ګواښونو څخه د خلکو ژوند، مال او شتمنۍ خوندي وساتل شي.
د کونړ ولایت له پېښو سره د مبارزې آمادګۍ ریاست ټینګار کوي چې د خطرونو د کمولو، د عامه زیربناوو د ساتنې او د خلکو د خوندیتوب د تأمین په موخه به د وقایوي پروژو او اقداماتو پلي کول په دوامداره توګه روان وي.
