د بادغیس ولایت له پېښو سره د مبارزې آمادګۍ ریاست ۳,۹۶۴ وچکالۍ ځپلو کورنیو ته نغدي مرستې ووېشلې
له پېښو سره د مبارزې آمادګۍ ادارې او د ژغورنې نړیوالې کمېټې (IRC) ترمنځ د لاسلیک شوي هوکړه لیک پر بنسټ، د بادغیس ولایت له پېښو سره د مبارزې آمادګۍ ریاست د یادې کمېټې په مالي ملاتړ، د یاد ولایت په آبکمري، سنګآتش او مقر ولسوالیو کې ۳۹۶۴ وچکالۍ ځپلو کورنیو ته، له سروې وروسته نغدي مرستې ووېشلې.
په دې لړۍ کې، د مسئولینو په شتون کې هرې کورنۍ ته ۱۲,۸۰۰ افغانۍ نغدي پیسې ووېشل شوې، چې د یاد شمېر کورنیو لپاره په ټولیز ډول پنځوس میلیونه او اووه لکه او نه دېرش زره او دوه سوه (۵۰,۷۳۹,۲۰۰) افغانۍ ځانګړې شوې وې.
د سیمې اوسېدونکو او له مرستو برخه منو کورنیو د دې بشري مرستې له ترسره کېدو خوښي څرګنده کړه او د بادغیس ولایت له پېښو سره د مبارزې آمادګۍ ریاست او یادې مؤسسې له دوامدارو همکاریو او ملاتړ څخه یې مننه وکړه. هغوی همدارنګه د زیانمنو او اړمنو کورنیو د ملاتړ لپاره د ورته مرستو د دوام غوښتنه وکړه.
نېټه:۱۴۴۷/۱۲/۰۸ هـ ق
له پېښو سره د مبارزې آمادګۍ اداره
