د لغمان ولایت له پېښو سره د مبارزې آمادګۍ ریاست ۱,۰۰۰ اجباري راستنو شویو کورنیو ته خوراکي مرستې ووېشلې
د لغمان ولایت له پېښو سره د مبارزې آمادګۍ ریاست کډوالو ته د رسېدنې کمېټې سره په همغږۍ، د دې ولایت د بېلابېلو ولسوالیو اړوند له ګاونډیو هېوادونو څخه په اجبارې توګه راستنو شویو او مستحقو ۱۰۰۰ کورنیو ته خوراکي مرستې ووېشلې.
یادې مرستې د لغمان ولایت د والي محترم الحاج قاري بختیار معاذ، له پېښو سره د مبارزې آمادګۍ د رئیس قاري خیرمحمد غازي او د نورو سیمه ییزو مسؤولینو په شتون کې هرې کورنۍ ته ۲۵ کیلوګرامه اوړه، ۱۲ کیلوګرامه خرما، ۵ لیتره غوړي، ۱۰ کیلوګرامه وریجې او یو بشپړه بسته، چې ۱۲ قلمه خوراکي توکي پکې شامل وو ووېشل شوه.
د لغمان ولایت له پېښو سره د مبارزې آمادګۍ رئیس قاري خیرمحمد غازي وویل، چې دا مرستې وروستۍ مرستې نه دي او د کډوالو د رسېدنې کمېټه هڅه کوي، تر څو د یادو شوو کورنیو تر څنګ نورو اړمنو کورنیو ته هم په بېلابېلو برخو کې لازمې مرستې برابرې کړي.
د یادونې وړ ده، چې د دې کورنیو لپاره د پېښو د خطرونو په اړه عامه پوهاوی هم وړاندې شو.
د مرستو ترلاسه کوونکو کورنیو له دې اقدام څخه خوښي څرګنده کړه او د کډوالو ستونزو ته پر وخت د رسېدنې له امله یې د افغانستان د اسلامي امارت له مسؤلینو مننه وکړه او زیاته یې کړه، چې دا مرستې به د هغوی د ژوند د عاجلو ستونزو یوه برخه راکمه کړي.
نېټه: ۱۴۴۷/۸/۱۷ هـ ق
له پېښو سره د مبارزې آمادګۍ ملي اداره
