د فراه ولایت له پېښو سره د مبارزې آمادګۍ ریاست ۳۹۶ سېلاب ځپلو کورنیو ته خوراکي او غیرخوراکي مرستې ووېشلې
د فراه ولایت له پېښو سره د مبارزې آمادګۍ ریاست، د دې ولایت په فراه رود او خاک سفید ولسوالیو کې د وروستیو سېلابونو له امله ۳۹۶ زیانمنو کورنیو ته له سروې وروسته خوراکي او غیرخوراکي مرستې ووېشلې.
په دې لړۍ کې د مسؤلینو په شتون کې، له یاد شمېر څخه ۳۶۲ کورنیو هرې یوې ته ۵۰ کیلو اوړه، ۵ کیلو بوره، نیم کیلو تور چای او ۳۴ کورنیو ته چې کورونه یې زیات وېجاړ شوي وو، هرې کورنۍ ته د یادو خوراکي توکو سربېره یو باب خیمه هم ووېشل شوه.
د فراه ولایت له پېښو سره د مبارزې آمادګۍ ریاست مسؤلینو، د طبیعي پېښو له امله زیانمنو شویو خلکو سره د مرستو پر دوام ټینګار وکړ او ډاډ یې ورکړ، چې یاد ریاست د اړوندو ادارو او همکارو بنسټونو سره په همغږۍ هڅه کوي، تر څو په لنډ ممکن وخت کې د اړمنو کورنیو لپاره لا زیاتې مرستې برابرې کړي او په زیانمنو سیمو کې د بشري ستونزو د زیاتېدو مخه ونیسي.
نېټه:۱۴۴۷/۷/۲۷ هـ ق
له پېښو سره د مبارزې آمادګۍ ملي اداره
