له پېښو سره د مبارزې آمادګۍ ملي ادارې لوی رئیس د پکتیا ولایت په وزې ځدراڼ ولسوالۍ کې د استنادي دیوال پروژه ګټېاخیستنې ته وسپارله
نن دوشنبه له ماسپښین وروسته، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، د پکتیا ولایت د وزې ځدراڼ ولسوالۍ ته د سفر پر مهال، د یو لړ ځانګړو مراسمو په ترڅ کې په داسې حال کې، چې د پکتیا ولایت له پېښو سره د مبارزې آمادګۍ رئیس، محترم مولوي نثار احمد نجات، د یادې ولسوالۍ ولسوال، عزتالله مخلص، د اطلاعاتو او نشراتو رئیس او ویاند حافظ محمد یوسف حماد، د داخلي پلټنې آمر، قاري محمد یاسین شاعر، خبریالانو او قومي مشرانو ګډون درلود، د استنادي دیوال پروژه ګټېاخیستنې ته وسپارله.
محترم ترابي صاحب وویل، چې د عالیقدر امیرالمؤمنین حفظهالله له لوري د هر ولایت لپاره د یو میلیون افغانیو په ارزښت بېړنۍ پروژه منظوره شوې وه، چې ډېری یې پلې شوې دي. نوموړي زیاته کړه، چې د سیلابونو د خطر د کمولو په موخه په ټولو ولایتونو کې د سیلابي لارو د پاکولو بهیر هم پیل شوی دی. هغه وویل، چې دا استنادي دیوال د سیلابونو د خطر په کمولو کې اغېزمن دی او هڅه کوو چې په راتلونکي کې هم په دې ولایت کې نورې پروژې پلي کړو.
په همدې حال کې، د وزې ځدراڼ ولسوالۍ ولسوال، عزتالله مخلص یاد ولایت ته د ترابي صاحب له پاملرنې مننه وکړه او د لا زیاتو پرمختیایي پروژو د پلي کولو غوښتنه یې وکړه.
همدارنګه، د پکتیا ولایت له پېښو سره د مبارزې آمادګۍ رئیس، مولوي نثار احمد نجات وویل، چې د ترابي صاحب د هڅو او پاملرنې له برکته د خطرونو د کمولو او د مرستو د وېش په برخه کې ګڼ مثبت اقدامات شوي دي. نوموړي زیاته کړه، چې سره له دې چې تېر کال په دې ولایت کې د موسسو په همکارۍ ۱۵ پروژې پلې شوې دي، خو بیا هم د لا زیاتو پروژو اړتیا شتون لري.
له بلې خوا، قومي مشرانو حاجي نواب او ډاکتر جمیل د یادې پروژې له پلي کېدو څخه خوښي څرګنده کړه او له اسلامي امارت څخه یې د مننې ترڅنګ د دې نظام د بقا لپاره د خیر دعاو وکړه.
د یادونې وړ ده، چې دغه پروژه د ۱۶۰ متره په اوږدوالي او ۴.۵ متره په لوړوالي، د ۲,۰۵۰,۰۰۰ افغانیو په لګښت د ادارې او د ولایت مقام له بودجې څخه پلې شوې ده، چې له امله یې اوس د سیمې هستوګنیز کورونه، کرنیزې ځمکې، سړک او عامهالمنفعه تاسیسات د سیلاب له ګواښونو څخه خوندي شوي دي.
د یادونې وړ ده، چې د مراسمو په پای کې د سیمې خلکو له پېښو سره د مبارزې آمادګۍ ملي ادارې لوی رئیس او د هغه مل پلاوي ته ډالۍ هم ورکړې.
نېټه: ۱۴۴۷/۷/۱۵ هـ ق
له پېښو سره د مبارزې آمادګۍ ملي اداره
