په ملک پوله کې له پېښو سره د مبارزې آمادګۍ ملي اداري له لوري په جوړ شوي پنډغالي کې د خدماتو رسونې له لړۍ څخه د پېښو چارو د همغږۍ معین څارنه ترسره کړه
له پېښو سره د مبارزې آمادګۍ ملي ادارې د پېښو چارو د همغږۍ معین؛ محترم الحاج ملا عبدالولي څارنوال (حاجي وارث) نیمروز ولایت ته د خپل رسمي سفر په ترڅ کې، په ملک پوله کې د دې ادارې له لوري د راستنېدونکو لپاره له نوي جوړ شوي پنډغالي څخه لیدنه او څارنه وکړه.
په دې لیدنه کې، له معین صاحب سره د نیمروز ولایت له پېښو سره د مبارزې آمادګۍ ریاست رئیس؛ محترم الحاج مولوي محمد قاسم محمد هم مل وو.
د دې څارنې موخه، له ایران هېواد څخه راستنو شویو هېوادوالو ته د خدماتو رسونې د حالت ارزونه او د راستنېدونکو لپاره د اوبو، خوراک، روغتیا ساتنې او لنډمهالې سرپناه د برابرولو برخه کې د اړوندو بنسټونو له اړینې همغږۍ څخه د ډاډ ترلاسه کول وو.
د کتنې په لړۍ کې، معین صاحب په پنډغالي کې د شته امکاناتو د ارزونې ترڅنګ د راستنېدونکو کورنیو اساسي اړتیاوو ته د بیړنۍ رسېدنې او د خدماتو د کچې په لوړېدو باندې ټنګار وکړ.
د یادونې وړ ده، چې له پېښو سره د مبارزې آمادګۍ ملي اداره د نړیوالو بنسټونو او بشري شریکانو په ملاتړ، په ملک پوله کې د خپلو راستنېدونکو هېوادوالو لپاره اړین خدمات برابر کړي دي او هڅه کوي ترڅو دا لړۍ په منظم ډول دوام ولري.
نېټه: ۱۴۴۷/۰۵/۰۸ هـ ق
له پېښو سره مبارزې آمادګۍ ملي اداره
