د کنړ ولایت په دره پیچ او چپه دره ولسوالیو کې د وروستی زلزلې له امله د ۳ تنه شهیدانو او ۱۶۹ تنه ټپیانو ورثه ته نغدي مرستې ووېشل شوې
د عالیقد امیرالمؤمنین حفظه الله د مهربانۍ او زلزله ځپلو ته د رسېدنې کمېټې د لارښوونې له مخې، د کنړ ولایت له پېښو سره د مبارزې آمادګۍ ریاست، د کنړ ولایت په دره پيچ او چپه دره ولسوالیو کې د وروستۍ زلزلې له امله د ۳ تنه شهیدانو او ۱۶۹ تنه ټپیانو ورثه ته نغدي مرستې ووېشلې.
دا لړۍ، له پېښو سره د مبارزې امادګۍ د رئیس؛ محترم مولوي محمد مبین مفتون عمر، د یادو ولسوالیو د ولسوالانو او د علماوو کمېټې له لوري د تعیین شوي پلاوي او همدارنګه د سرې میاشتې د پلاوو په شتون کې تطبیق شوه.
په دې لړۍ کې، له دره پیچ ولسوالۍ څخه ۱۰۲ تنه ټپانو هره یوه ته ۱۰،۰۰۰ افغانۍ او د ۳ تنه شهیدانو هر یوه ورثه ته ۲۰،۰۰۰ افغانۍ او همداراز په چپه دره ولسوالۍ کې ۶۷ ټپیانو هر یوه ته ۱۰،۰۰۰ افغانۍ ووېشل شوې.
باید وویل شي، چې دا لړۍ له وړاندې څخه د څوکۍ او نورګل ولسوالیو په ټولو زلزله ځپلو سیمو کې تطبیق شوې ده.
نېټه: ۱۴۴۷/۰۴/۰۱ هـ ق
له پېښو سره د مبارزې آمادګۍ ملي اداره
