د لغمان ولایت له پېښو سره د مبارزې آمادګۍ ریاست ۹۸ زیانمنو کورنیو ته غیرخوراکي مرستې ووېشلې
د کډوالۍ نړیوال سازمان (IOM)، د خوړو نړیوال پروګرام (WFP) او د ملګرو ملتونو د نفوس صندوق (UNFPA) سازمانونو سره له پېښو سره د مبارزې آمادګۍ ملي ادارې د همغږۍ پر بنسټ، د لغمان ولایت له پېښو سره د مبارزې آمادګۍ ریاست د یادو سازمانونو په مالي ملاتړ، د دې ولایت بېلابېلو ولسوالیو اړوند ۹۸ زیانمنو کورنیو ته غیرخوراکي مرستې ووېشلې.
په دې لړۍ کې د مسؤلینو په شتون کې، د کډوالۍ نړېوال سازمان (IOM) لخوا هرې کورنۍ ته د پخلنځي یو بشپړ کېټ، د کور جوړولو بيړنی کيټ، يو هايجن کيټ، پلاستيکي فرش، يو د کمپلو کېټ او د لمريزي بريښنا څراغونه وویشل شول. همدارنګه، ۵۰ هغو کورنیو ته چې کورونه یې په بشپړ ډول ویجاړ شوي وو، هرې کورنۍ ته یو باب خیمه هم ووېشل شوه.
د دې ترڅنګ، د UNFPA سازمان له لوري هرې کورنۍ ته ژمنی کيټ (کمپله او ترپال) او ډيګنټي کيټ هم ووېشل شول.
مرسته اخيستونکو کورنيو خوښي وښوده او دې ته ورته د مرستو د دوام غوښتنه يې وکړه.
نېټه: ۱۴۴۷/۰۳/۰۶ هـ ق
له پېښو سره د مبارزې آمادګی ملي اداره
