له پېښو سره د مبارزې آمادګۍ ملي ادارې او د APBHO مؤسسې تر منځ ټولټال د يوولس زره او شل (۱۱,۰۲۰) ډالرو په ارزښت د ګډو همکاريو تفاهمنامه لاسليک شوه
نن ورځ د سېشنبه سهار، له پېښو سره د مبارزې آمادګۍ ملي ادارې د مالي او اداري عمومي رئيس، محترم الحاج مولوي محمد عالم علميار د APBHO مؤسسې له مرستيال محمد احسان صابري سره په خپل کاري دفتر کې وکتل او د ګډو همکاريو تفاهمنامه يې ورسره لاسليک کړه.
محترم علميار صاحب د دې ليدنې پر مهال وويل، چې افغانستان د ټولو ګډ کور دی او د هر افغان دنده ده چې د خپلو نورو هېوادوالو په مرسته او لاسنيوي کې برخه واخلي. هغه زياته کړه چې د دې تفاهمنامې لاسليک د هېواد له زيانمنو خلکو سره د مرستې رسولو په برخه کې يو مهم ګام دی او موږ د دې ډول پروګرامونو له پيل او پرمخ وړلو ملاتړ کوو.
له بلې خوا، د APBHO مؤسسې مرستيال محمد احسان صابري د هغه پروژې په اړه معلومات ورکړل چې په نږدې راتلونکي کې به په پروان ولايت کې پلي کېږي، او ژمنه يې وکړه چې پروژه به په چټکۍ او روڼتیا سره عملي کړي.
په پای کې دواړو لوریو ټولټال د يوولس زره او شل (۱۱,۰۲۰) ډالرو په ارزښت د ګډو همکاريو تفاهمنامه لاسليک کړه. د دې تفاهم نامې له مخې ټاکل شوې چې ياده مؤسسه به د خوړو نړیوال پروګرام په ملاتړ، د پروان ولايت په ولسواليو کې د پېښې د رامنځته کېدو په صورت کې، له سروې وروسته، ۲۴۵ کورنيو ته يا د نغدو پيسو او يا هم د خوراکي توکو مرستې ووېشي. په دې مرسته کې د هرې کورنۍ لپاره ۱۰۰ کيلو اوړه، ۹.۱ کيلو غوړي، يو کيلو مالګه او ۱۲.۵ کيلو دال په پام کې نیول شوي دي.
نېټه: ۱۴۴۷/۲/۱۸ هـ ق
له پېښو سره د مبارزې آمادګۍ ملي ادارې
