د ایریاماین پاکۍ موسسې له پېښو سره د مبارزې آمادګۍملي ادارې له بنسټیز روغتیايي کلینیک سره د ۴۱ قلمه درملو مرسته وکړه
له پېښو سره د مبارزې آمادګۍ ملي ادارې د سرپرست، محترم الحاج ملا نورالدین ترابي، د هڅو او همغږۍ په پایله کې، د ایریا ماین پاکۍ موسسې د دې ادارې د کارکوونکو د روغتیايي خدماتو د ملاتړ په موخه، د دې ادارې له بنسټیز روغتیايي کلینیک سره د ۴۱ قلمه اړینو درملو مرسته وکړه. دغه درمل چې د سرپايي ناروغانو د درملنې لپاره اړین توکي پکې شامل دي، د روغتیايي خدمتونو د کیفیت په لوړولو کې مهم رول لري.
یاده مرسته له پېښو سره د مبارزې آمادګۍ ملي ادارې په انګړ کې د دې ادارې د ماین پاکۍ د همغږۍ او انسجام رئیس، محترم قاري نورالدین رستمخېل، له خوا ترلاسه شوه. ښاغلي رستمخېل د موسسې له مسؤلینو څخه د مننې تر څنګ، دا مرسته د دې ادارې د کارکوونکو لپاره د روغتیايي خدمتونو د پیاوړتیا په برخه کې مهم ګام وباله او ټینګار یې وکړ چې د دواړو ادارو ترمنځ به د بشردوستانه او ملاتړ کوونکو خدمتونو په برخه کې دا ډول همکارۍ دوام او پراختیا ومومي.
نېټه: ۱۴۴۷/۰۱/۲۷ هـ ق
له پېښو سره د مبارزې آمادګۍ ملي اداره
