د کابل ولایت په قره باغ ولسوالۍ کې د دوو استنادي دېوالونو جوړولو د پروژې د بنسټ ډبره کېښودل شوه
د کابل ولایت له پېښو سره د مبارزې آمادګۍ رئیس، محترم الحاج مولوي نجیب الله انوري، له پېښو سره د مبارزې آمادګۍ ملي ادارې د تخنیکي پلاوي، د قره باغ ولسوال، د کلي مشرانو او د سیمې د اوسېدونکو په شتون کې، د کابل ولایت د قره باغ ولسوالۍ په استرغیچ کلي کې د طبیعي پېښو د خطرونو او زیانونو د کمولو په موخه د دوو استنادي دېوالونو جوړولو د پروژې د بنسټ ډبره کېښوده.
دا پروژه د عالیقدر امیرالمؤمنین حفظهالله د حکم له مخې او له پېښو سره د مبارزې آمادګۍ ملي ادارې لخوا تمویل او ټولټال د اته سوه څلورویشت زره او پنځه سوه درې شپېته (۸۲۴,۵۶۳) افغانیو په ارزښت پلي کېږي، چې موخه یې د طبیعي پېښو د خطرونو کمول او د سیلابونو او نورو احتمالي پېښو له امله د خلکو د ځاني او مالي زیانونو مخنیوی دی.
د کابل ولایت له پېښو سره د مبارزې آمادګۍرئیس وويل, چې د استرغیچ کلي له خطر سره مخ دوه سیمې مخکې له پېښو سره د مبارزې آمادګۍ ملي ادارې د تخنیکي ټیم له لوري سروې او تثبیت شوې وې چې اوس مهال دا پروژه په کې پلي کېږي, دا پروژه چې په دوو برخو ویشل شوې، د مجموعاً ۸۹ مترو په اوږدوالي دوه استنادي دېوالونه لري؛ لومړی یې ۳۳ متره او دویم یې ۵۶ متره اوږدوالی لري او د یادو استنادي دېوالونو چارې به د اروزګان غزني ساختماني او لوژستیکي شرکت له لوري بشپړې شي.
د سیمې خلکو د دې پروژې له پیل څخه تود هرکلی وکړ، دا یې یوه مهمه اړتیا وبلله، د نظام د ثبات او بقا دعا یې وکړه او د اسلامي امارت له مشرتابه څخه یې مننه او قدرداني وکړه چې د خلکو د ځان او مال د خوندي ساتلو لپاره عملي ګامونه اخلي.
نېټه: ۱۴۴۷/۱/۱۸ هـ ق
له پېښو سره د مبارزې آمادګۍ ملي اداره
