له پېښو سره د مبارزې آمادګۍ ملي ادارې او د بشردوستانه موسسو ترمنځ د همغږۍ دویمه غونډه ترسره شوه
له پېښو سره د مبارزې آمادګۍ ملي ادارې او د بشردوستانه موسسو ترمنځ د همغږۍ دویمه غونډه د یادې ادارې د بهرنیو اړیکو د سرپرست, برهان الدین شینواري په مشرۍ او د AFGHAN AID، IRW، ORCDG، AKAH او ACTION AID مؤسسو د استازو په ګډون ترسره شوه او د پېښو پر وړاندې د مبارزې په برخه کې د فعالو بنسټونو ترمنځ د دوامداره همکارۍاو همغږۍ پر اړتیا یې ټینګار وکړ.
په دې ناسته کې برهانالدین شینواري د ټولو مؤسسو له هڅو څخه مننه وکړه او د بادغیس ولایت د دره بوم ولسوالۍ د بیړني وضعیت او د وچکالۍ د بحران په اړه یې معلومات وړاندې کړل. نوموړي له ټولو مؤسسو وغوښتل چې دې وضعیت ته د رسېدنې لپاره پراخې او ګډې همکارۍ ته دوام ورکړي.
د مؤسسو استازو هم وچکالي یوه جدي ننګونه وبلله او ژمنه یې وکړه چې د زیانمنو سیمو پېژندنه به وکړي او دا معلومات به له پېښو سره د مبارزې آمادګۍ ملي ادارې او نړیوالو مرسته کوونکو سره شریک کړي.
دا ناسته د ګډو هڅو د بریا په هیله مندۍ او دعا سره پای ته ورسېده.
نېټه:۱۴۴۶/۱۲/۱۹ هـ ق
له پېښو سره د مبارزې آمادګۍ ملي اداره
