له پیښو سره د مبارزې آمادګۍ ملي ادارې سرپرست د UNHCR سرپناه کلستر د همغږي کوونکي مشر سره وکتل
کابل-۲۳صفرالمظفر۱۴۴۶
له پیښو سره د مبارزې آمادګۍ ملي ادارې سرپرست محترم الحاج ملا نورالدین ترابي نن سهار په خپل کاري دفتر کې د UNHCR سرپناه کلستر د همغږي کوونکي مشر آئيني موټيف او د لنډمهاله سرپناه مرستیال محمد هاشم نیازی سره وکتل او د راتلونکي ژمي لپاره د اړمنو او احتمالي زیانمنو کسانو سره د مرستې په اړه یې خبرې وکړې.
محترم ترابي صاحب وویل چې زما د کار پالیسي دا ده چې موسساتو ته اسانتیاوې برابرې کړم او د دوی کارونه په وخت ترسره کړم او له هغوی څخه هم تمه لرم چې خپل کار په چټکۍ او روڼتیا سره ترسره کړي. نوموړي همدارنګه څرګنده کړه چې هغه موسسات چې د ژمي د مرستې لپاره برنامه لري باید د میزان تر میاشتی پوری خپل چمتووالي ولرې ترڅو مرستي په وخت اړمنو کسانو ته ورسول سې.
له پیښو سره د مبارزې آمادګۍ ملي ادارې سرپرست درې مهم ټکي په ګوته کړل چې باید د مرستو په ترسره کولو کې په نظر کې ونیول سې:
1- په هر فصل کې باید د هغه فصل اړینې مرستې ترسره شي .
2- هغه مرستې چې افغانستان ته له بهر څخه راوړل کیږي باید له هغو بندرونو څخه داخل سې چې د اړتیا لرونکي ساحې سره نږدې وي.
3- مرستندویه توکي باید د زیانمنو خلګو اړتیاوو او د افغانستان فرهنګ سره سم وي.
په همدې حال کې، د UNHCR سرپناه کلستر د همغږي کوونکي مشر د خپل کاري راپور په وړاندې کولو سره وویل چې موږ په ټوله افغانستان کې د غیر خوراکي مرستو او د زیانمنو خلکو لپاره د سرپناه ترمیم او جوړولو په برخه کې کار کوو. هغه زیاته کړه چې موږ په اوچا سره په همغږۍ کې د راتلونکي ژمي لپاره چمتووالي نیسو او کمپلې، ګرمې جامې او د کورونو د تودولو لپاره د سون توکي به د IMAP لخوا ترتیب شویو په شدت سره یخني لرونکو ولسوالیو کې اړمنو کورنیو ته وویشو. همدارنګه موږ به خپلو مرستو کې کورونو ترمیم او جوړونه، خیمې، ترپال، د آشپزې وسایل، سولر، د کور جوړولو بسته او د درو میاشتو لپاره د کور کرایه نغدي مرسته شامله کړو.
په پای کې دواړو خواوو په دې ټینګار وکړ چې داسې ناستې دې پرلپسې ترسره سې او د زیانمنو خلکو د مرستو لپاره دې لا زیاته همغږي وسې.
