د پېښو پر وړاندې چمتووالي ملي ادارې د نوی سرپرست د کار پیل
د افغانستان اسلامي امارت د چارو ادارې عمومي رییس: الحاج ملا نورالدین ترابي د ادارې پر مسایلو پوه شخصیت دی
کابل- د چنګاښ ۱۹-۱۴۰۳
محترم الحاج ملا نورالدین ترابي، د عالیقدر امیرالمومنین شیخ صاحب حفظ الله د حکم پر بنسټ نن ورځ د پېښو پر وړاندې چمتووالي ملي ادارې د سرپرست په توګه د محترم شیخ نورالحق انور د چارو ادارې عمومي رییس لخوا او د محترم ملا عبدالولي څارنوال د پېښو چارو د همغږۍ مرستیال، الحاج عبدالرحمن زاهد د مالي او اداري عمومي رییس، د اسلامي امارت یو شمېر مقاماتو او مجاهدینو په حضور کې د یوې رسمي غونډې په ترڅ کې معرفي شو او خپل کار یې پیل کړ.
د پېښو پر وړاندې چمتووالي ملي ادارې د سرپرست معرفي کولو په پروګرام کې، محترم الحاج عبدالرحمن زاهد د مالي او اداري عمومي رییس ووېل: چې په حکومتولۍ کې ادلون او بدلون یو اصل دی او د خدای ج او د هغه له پیغمبر ص وروسته، د امیرالمومنین اطاعت واجب دی او هر څوک چې د هغه لخوا سرپرست ټاکل کېږي د هغه اطاعت پر موږ باندې واجب دی.
ورته مهال د چارو ادارې عمومي رییس، د لارښوونکي وینا ترڅنګ د الحاج ملا نورالدین ترابي د پېښو پر وړاندې چمتووالي ملي ادارې د سرپرست د جهادي کړنو او زړورتیاوو څخه یادونه وکړه او نوموړۍ یې د ادارې پر مسایلو یو پوه شخصیت وباله، او هغه یې چارو ته د رسېدنې او خلکو ته د خدمت په برخه کې یو پیاوړی شخصیت معرفي کړ.
همدارنګه محترم مولوي شمس الدین حقیار، د دې ادارې د نړۍ والو اړیکو رییس د مرکزي او ولایتي کارکونکو په استازیتوب ووېل: چې په تېرو درېیو کلونو کې زیاتې هڅې شوي ترڅو پېښو ته په وخت سره رسېدنه وشي او له دی وروسته هم تر خپل توان پورې یې د نوی سرپرست په مشرۍ د هر ډول همکاري ژمنه وکړه.
په پای کې محترم الحاج ملا نورالدین ترابی، د پېښو پر وړاندې چمتووالي ملي ادارې سرپرست په خپلو خبرو کې د امیرالمومنین حفظ الله تعالی له باور څخه په مننې سره ووېل: چې په مختلو ادارو کې د تجربې له مخې به هڅې وشي ترڅو چارې په ښه توګه ترسره شي. نوموړي همدارنګه زیاته کړه چې د چارو په ترسره کولو کې به د پشتون او تاجیک، بدخشي او کندهاري ترمنځ هیڅ ډول تبعیض رامنځته نشي او هر چا ته چې کار سپارل کېږي، د هغه ترسره کول به پر هغه باندې فرض وي.
د ادارې سرپرست ووېل: چې که چېرته د هغه حکم د امیرالمومنین، ریاست الوزرا، د شریعت د حکم او یا هم د نورو قوانینو سره په ټکر کې و، نو ده ته دی ګوته ونیول شي، نوموړي زیاته کړه چې په دغه اداره کې استخبارات، د فرامینو د څارنې لوی ریاست او امر باالمعروف او نهی عن المنکر کولای شي چې په آزادانه ډول له دی ادارې څخه څارنه وکړي.
