پکتيا پېښو پر وړاندې د مبارزې او چمتوالي رييس د (IRC) له توزيع څخه څارنه تر سره کړه

پکتیا  - ۱۴۴۴/۱۰/۲۰
پکتيا ولايت د پېښو پر وړاندې د مبارزې او چمتوالي رييس مولوي نثار احمد نجات د خپل کاري ټيم په ملتيا زرمت ولسوالۍ ته په داسې وخت کې کاري سفر تر سره کړ، چې هلته د IRC (ژغورنې نړيوالې موسسې) پر ۲۰۰ اړمنو د البسې د توزيع لړۍ روانه وه، مولوي نثار احمد نجات د توزيع ځای ته لاړ او توزيع يې له نږدې څخه وڅارله. 
ده د يادې موسسې له مسوولينو مننه وکړه، چې زموږ سره په همغږۍ باندې سيمې او اړمنې کورنۍ سروې کوي او وروسته ورسره د بېلابېلو توکو مرستې تر سره کوي په ياده مرسته کې هرې سروې شوې اړمنې کورنۍ ته درې کمپلې، نارينه او ښځينه بوټان، د نارينه او ښځينه له پاره څادرونه، د ښځينه او نارينه له پاره چاکټونه او د ماشومانو جرابې شاملې وې.
د يادونې وړ ده، چې له دې وړاندې هم يادې موسسې په ډنډې پټان ولسوالۍ، لجه منګل ولسوالۍ، احمدخيلو ولسوالۍ، ميرزکې ولسوالۍ، سيدکرم ولسوالۍ، روحاني بابا ولسوالۍ او نن ورځ په زرمت ولسوالۍ کې پر سروې شوو اړمنو د البسې کېټونه وويشل شول، چې ټولټال (۱۱۰۰) کورنۍ له يادې مرستې برخمنې شوې.