د هوا سړېدو له امله ۳۵۰ زیانمنو او بېوزله کورنیو په ګردېز کې خوراکي مرستې ترلاسه کړې
پکتیا- د کب ۱۸مه-۱۴۰۱
د پکتیا ولایت پېښو سره د مبارزې ریاست، د بشري مرستو په ترڅ کې نن ورځ ۳۵۰ کورنیو ته چې بېوزله او د هوا سړېدو له امله زیانمنې شوي وې، خوراکي مرستې ووېشلې.
مولوي نثار احمد نجات د پکتیا ولایت پېښو سره د مبارزې رییس، د دغو مرستو د وېش په پروګرام کې ووېل: دغه مرستې بېوزله د هوا سړېدو او د ژمنیو پېښو له امله زیانمنو کورنیو ته، پېښو ته د رسېدو وزارت د مقام د لارښوونې او د دغه ولایت پېښو سره د مبارزې دولتي کمېټې له پرېکړې وروسته یاد شمېر کورنیو ته ووېشل شوې.
ښاغلي نجات د دغو توکو د وېش پر مهال زیاته کړه: په دغه پړاو کې هرې کورنۍ ته ۵۰ کیلو اوړه، ۵۰ کیلو وریجې، ۲ کیلو چاۍ او ۶ کلچې صابون ووېشل شول.
