د اقلیمي بدلون نړیوالې اونۍ په لمانځغونډه کې پېښو ته د رسېدو په چارو کې د دولت وزیر ګډون
کابل- د تلې ۲۴مه-۱۴۰۱
د اقلیمي بدلون نړیواله اونۍ، نن ورځ د ریاست الوزرا د اداري مرستیال مقام، پېښو ته د رسېدو په چارو کې د دولت وزیر، د کډوالو چارو وزیر، د خپلواکو ادارو رییسانو او د اړوندو ادارو د مرستیالانو په شتون په کابل کې ولمانځل شوه.
محترم حافظ عزیزالرحمان، د چاپېړیال د ساتنې ملي ادارې سرپرست لومړۍ میلمنو ته په ښه راغلاست سره د اقلیمي بدلون د بدو اغیزو د کمولو لپاره د دغې ادارې پر اقداماتو باندې خبرې وکړې.
ورته مهال محترم عبدالسلام حنفی، د ریاست الوزرا اداري مرستیال، ووېل چې د افغانستان سویلي او شمالي ولایتونه د بارانونو په کمښت سره د اقلیمي بدلونونو د اغېزو سره مخامخ دي او د افغانستان اسلامي امارت په خپل ټول توان سره هڅه کوي ترڅو د دغو بدلونونو څخه رامنځته شوي پایلې کمې کړي.
د دغه پروګرام په یوه برخه کې، محترم ملا محمد عباس آخند پېښو ته د رسېدو په چارو کې د دولت وزیر د چاپېړیال د ساتنې اهمیت ته په اشارې سره ووېل چې اقلیمي بدلونونه دوام لري او د نړۍ زیات شمېر برخې یې اغیزمنې کړې دي.
نوموړي د دې ترڅنګ چې د چاپیړیال ساتنه یې یو ګډ کار وباله، زیاته یې کړه چې د چاپېړیال ساتنې او د اقلیمي بدلون منفي اغېزو څخه د مخنیوي او د سیلابونو د مدیریت لپاره باید په هیواد کې د ځنګلونو له منځه وړلو څخه ډډه وشي.
د یادونې وړ ده چې په دغه پروګرام کې د کډوالو چارو وزیر، د بهرنیو چارو وزارت سیاسي مرستیال او د اړوندو ادارو مسوولینو په خپل وار سره خبرې وکړې او د دغو ادارو انجنیرانو د موضوع په اړه خپل سیمینارونه هم وړاندې کړل.
