پېښو ته د رسېدو په چارو کې د دولت وزارت مرستیال ګیان ولسوالي ته ولاړ؛ په یاده ولسوالۍ کې یې د علماوو شورا او قومي مشرانو سره ولیدل
پکتیکا- د تلې ۱۳مه-۱۴۰۱
الحاج مولوي شرف الدین مسلم، پېښو ته د رسېدو په چارو کې د دولت وزارت مرستیال او د خوست او پکتیکا ولایتونو زلزلې ځپلو ته د مرستو د تنظیم کمېسیون سرپرست تېره ورځ د تلې په ۱۲مه، د پکتیکا ولایت ګیان ولسوالۍ ته سفر وکړ او د علماوو شورا، د ورستۍ زلزلې له امله زیانمن شویو او په یاده ولسوالۍ کې یې د قومي مشرانو سره ولیدل او د هغوۍ ستونزې واورېدې.
په دغه لیدنه کې د ګیان خلکو د افغانستان اسلامي امارت او پېښو ته د رسېدو په چارو کې د دولت وزارت څخه د وروستۍ زلزلې ځپلو ته په وخت سره د رسېدنې لپاره مننه وکړه، د دایمي هستوګنځایونو جوړولو، مکتبونو، روغتونونو او دیني مدرسو او د سړک رغولو غوښتونکي شول.
وروسته د خوست او پکتیکا زلزلې ځپلو لپاره د مرستو د تنظیم او رسیدني کمېسیون سرپرست د ګیان خلکو سره ژمنه وکړه چې د هغوۍ ستونزې به حل شي او هغوۍ ته به د زلزلې پر وړاندې د بنسټیزو کورونو جوړولو پروسه پیل شي.
پېښو ته د رسېدو په چارو کې د دولت وزارت مرستیال، زیاته کړه چې د هغوۍ ستونزې او غوښتنې به په کتبي ډول له دغه کمېسیون سره شریک کړي ترڅو د هغوۍ غوښتنو ته رسېدنه وشي.
