د ۱۲.۸ میلیونه ډالرو په ارزښت ۲۰۰۰ کورونه به د زلزله ځپلو لپاره ورغول شي
کابل- د زمري ۱۶مه-۱۴۰۱
الحاج مولوي شرف الدین مسلم پېښو ته د رسېدو په چارو کې د دولت وزارت مرستیال نن سهار له سید شفیق الطاف د افغانستان لپاره د پراختیایي او بشري معاونیت موسسې (AHDAA) مسوول سره د زلزله ځپلو لپاره د کورونو جوړولو په اړه لیدنه او خبرې وکړې.
لومړۍ مولوی شرف الدین مسلم پېښو ته د رسېدو په چارو کې د دولت وزارت مرستیال، د پکتیکا ولایت په ګیان ولسوالۍ کې د زلزلې څخه په یادولو سره وویل: ګیان، برمل، سپیرې او ژورکې ولسوالیو ته د کورونو د بیا رغونې د څېړنې په پار د ویجاړ شویو کورونو د سروې ټیمونه او د انجنیرانو تخنیکي ټیم لېږل شوی او د زلزلې پېژندنې تخنیکي ټیم له نظریاتو څخه وروسته به په ګیان ولسوالۍ کې د بیا رغونې چارو اجازه ورکړل شي.
نوموړي زیاته کړه چې په برمل، سپیرې او ژورکې ولسوالیو کې موسسو د بیا رغونې چارې پیل کړي او دغه لړۍ روانه ده.
ورپسې سید شفیق الطاف د افغانستان لپاره د پراختیایي او بشري معاونیت موسسې (AHDAA)مسوول، په افغانستان کې د AHDAA موسسې پر فعالیتونو باندې په خبرو سره وویل: موږ په پام کې لرو ترڅو په پکتیکا او خوست کې د وروستۍ زلزلې ځپلو لپاره ۲۰۰۰ کورونه د ۱۲،۸۰۰،۰۰۰ امریکایي ډالرو په ارزښت ورغوو.
