په افغانستان کې د ملګرو ملتونو دفترونه؛ د خوست او پکتیکا زلزلې ځپلو لپاره به دایمي هستوګنځي ورغول شي
کابل- د زمري ۵مه-۱۴۰۱
د ملګرو ملتونو ادارو سره په همغږي او د بشري مرستو د تنظیم کمېسیون او زلزلې ځپلو ته د رسېدنې غونډه نن د الحاج مولوي شرف الدین مسلم، پېښو ته د رسېدو په چارو کې د دولت وزارت مرستیال او د کمېسیون سرپرست د کمېسیون غړو ادارو، په افغانستان کې ملګرو ملتونو دفترونو او موسسو په ګډون په خوست او پکتیکا کې د زلزلې ځپلو څخه د ملاتړ په پار ترسره کړه.
په دې غونډه کې پېښو ته د رسېدو په چارو کې د دولت وزارت مرستیال او د کمېسیون سرپرست په افغانستان کې د دولتي ادارو، ملي او نړیوالو موسسو او د ملګرو ملتونو دفترونو له بشري مرستو څخه د مننې ترڅنګ، وویل: د چنګاښ ۱ نېټې زلزلې له امله ۱۰۰۶ کسان شهیدان، ۳۰۴۰ ټپیان او ۱۷،۹۵۰ کورونه په بشپړه او نیمه توګه ویجاړ شوي دي.
الحاج مولوي شرف الدین مسلم زیاته کړه: اړتیا ده ترڅو زلزلې ځپلو ته د رسېدنې وروسته د هغوۍ لپاره دایمي کورونه جوړ شي.
ښاغلي مسلم وویل چې د ا.ا.ا د رییس الوزرا لارښوونې پر بنسټ، زلزلې ځپلو ته د رسېدنې او بشري مرستو د تنظیم کمېسیون، د پېښو ته د رسېدو په چارو کې د دولت وزارت مرستیال په سرپرستۍ د کورنیو چارو، د کلیو او پراختیا، د اقتصاد، د کرنې او اوبو لګولو، د کډوالو او راستنېدونکو او د ښار جوړونې وزارتونو او د احصاییه او د سرې میاشتې په غړیتوب سره د ښه مدیریت او رسېدنې په پار رامېنځته شوی او د ملګرو ملتونو او موسسو څخه له یاد کمېسیون سره د همغږي غوښتونکی شو.
نوموړي وویل: چې په سپېرې، ګیان او برمل ولسوالیو کې سیمو ته تخنیکي ټیمونه او انجنیران استول شوي، او د هغوۍ له نظرونو وروسته به د امکان په صورت کې په زیانمن شویو سیمو کې کورونه جوړ شي او د امکان په نشتوالي کې به د هغوۍ لپاره د ښوونځي، مدرسه او کلینک په درلودو سره نوی ښارګوټې ورغول شي.
پېښو ته د رسېدو په چارو کې د دولت وزارت مرستیال او د کمېسیون سرپرست د هیواد په کچه د سیلاب له امله اوښتي ځاني او مالي زیانونو په یادولو سره، وویل: اړتیا ده چې بشري مرستې دوام پیدا کړي او د مرستو رسولو لړۍ چټکه او د مرستو د ښه مدیریت او په مرستو رسولو کې د شفافیت لپاره د دولتي ادارو، ملي او نړیوالو موسسو ترمېنځ پر همغږي باندې ټینګار وکړ.
په دوام کې رامزالاکبروف او د ملګرو ملتونو د زلزلې پېژندې تخنیکي ټیم د پريزنټیشن وړاندې کولو ترڅنګ د مرستو رسولو لړۍ د چټکتیا او د زلزلې ځپلو لپاره د ۳۰۰۰ نویو کورونو جوړولو څخه یادونه وکړه او د ۶۰۰۰ نویو کورونو جوړولو لپاره یې ژمنه وکړه.
د غونډې په پای کې د تخنیکي ټیم او جیولوژیکي انجنیرانو پر سروې او پایلو باندې ټینګار وشو او پرېکړه وشوه ترڅو د بشري مرستو د وېش لپاره د دولتي ادارو او مرستندویه موسسو ترمېنځ پر لازمې همغږي او د وروستیو سیلابونو څخه زیانمن شویو ته چې کورونه، کرنیزې ځمکې او څاروي یې له لاسه ورکړي، د ژمي فصل څخه مخکې زلزلې ځپلو ته د دایمي کورونو جوړولو باندې ټینګار وشو.
