په وروستیو شپږ میاشتو کې د طبیعي پېښو له امله نېږدې ۸۰ زره زیانمنو کورنیو سره، مرسته شوې ده
سه شنبه، ۱۷ کب ۱۴۰۰- ۵ شعبان المعظم ۱۴۴۳
کابل، د رسنیو مرکز:
پېښو ته د رسېدو په چارو کې د دولت وزارت مرستیال وایي، دغه وزارت په تېرو شپږ میاشتو کې له مرسته کوونکو هېوادونو څخه سلګونه ټنه بشردوستانه مرستې، چې البسه، خوراکي، روغتیایي او نفتي توکي پکې شامل دي، ترلاسه کړي دي.
مولوي شرف الدین مسلم، چې د سه شنبې په ورځ یې د اسلامي امارت د اطلاعاتو او رسنیو مرکز کې د یوه خبري کنفرانس پر مهال خبرې کولې وویل، په ۶۳ واګونونو کې د خوراکي او غیر خوراکي توکو مرستې له ازبکستان هېواد څخه؛ دغه راز د پام وړ خوراکي او غیر خوراکي توکو مرستې له روسیې څخه؛ د څه باندې یو میلیون او ۳۰۰ زره کیلوګرامه ډیزلو او اوبلن ګاز، تودو لباسونو او سبزیجاتو مرستې له ترکمنستان څخه؛ د ۷۰ ټنه خوراکي او غیر خوراکي موادو مرستې د چین له ولسي جمهوریت څخه؛ د لسګونه ټنه خوراکي توکو او غنمو مرستې د پاکستان له اسلامي جمهوریت څخه او د ۲۰۰ ټنه خوراکي او غیر خوراکي توکو مرستې د قزاقستان له جمهوریت څخه ترلاسه شوي دي.
ښاغلي مسلم څرګنده کړه، چې پېښو ته د رسېدو په چارو کې د دولت وزارت په انفرادي ډول او د ملګرو ملتونو سازمان دفترونو سره په همغږۍ هڅه کړې، چې یادې مرستې په شفاف او عادلانه ډول په مرکز او ولایتونو کې پر اړمنو کسانو ووېشل شي.
پېښو ته د رسېدو چارو کې د دولت وزارت مرستیال زیاته کړه، چې له طبیعي پېښو زیانمنو ۷۹۶۷۰ کورنیو ته د خوراکي او غیر خوراکي مرستو وېش؛ د طبیعي پېښو له امله د څه باندې ۵۰ شهیدانو وارثانو سره نغدي مرستې؛ د والیانو په واسطه په ولایتونو کې له موجودو اضطراري زېرمو څخه له ۵۷ زره کورنیو سره مرستې؛ پر ۱۴۲۸۵۷ کورنیو د خوراکي، غیر خوراکي او نغدي بشردوستانه مرستو د وېش په موخه، د ملګرو ملتونو سازمان له دفترونو سره همغږي او په ښارونو کې د ۷۴ زره بېځایه شویو کورنیو سره نغدي مرستې او هغوی ته د سرپنا جوړول، د یادو کمکونو عمده موارد جوړوي.
نوموړي، د ژمي په موسم کې د اورښتونو پر مهال د لومړۍ، دویمې او درېیمې درجې مواصلاتي لارو خلاص ساتل؛ د سالنګ له تونل او ۲۹۸ صعب العبوره ځایونو څخه د ساتنې په موخه احتیاطي تدبیرونه؛ د طبیعي پېښو زیانمنو ته د بستر او روغتیایي خدمتونو وړاندې کول، د وزارت د نورو فعالیتونو په توګه یاد کړل.
پېښو ته د رسېدو چارو کې د دولت وزارت مرستیال، په تحکیماتي، محافظتي او پاکونې برخه کې د ۴۸ نویو او انتقالي پروژو پلانول، له سکتوري ادارو سره په همغږۍ له موسمي سېلابونو څخه د زیانمنونکو ستراتېژیکو سیمو د ۱۵۰ زره کورنیو لپاره د بشري مرستو لېږد او له احتمالي پېښو څخه د زیانمنونکو کورنیو، ټپیانو او شهیدانو وارثانو سره د نغدي مرستو په پام کې نیول، د دغه وزارت د راتلونکي کال د برنامو په توګه یادل کړل.
دغه زار ښاغلي مسلم وویل، چې د طبیعي پېښو ۱۸۷ زره زیانمنو کورنیو ته د خوراکي او غیر خوراکي توکو مرسته او روغتیایي خدمتونو وړاندې کول، په ۳۴ ولایتونو کې پېښو ته د رسېدو د ولایتي کمېټو لپاره د مستوفیتونو له لارې له اضطراري کوډ څخه د دوه سوه میلیونه افغانیو اجرا او لېږد هم د دغه وزارت د راتلونکی کال په پلان کې شامل دي.
