په کابل کې د بشري مرستو د لړۍ په ترڅ کې؛ ۲۵۰ زیانمنو کورنیو، معلولینو او نابینایانو ته خوراکي او غیر خوراکي مرستې ووېشل شوې
له پېښو سره د مبارزې آمادګۍ ملي ادارې د اطلاعاتو او عامه اړیکو رئیس او ویاند، محترم الحاج مولوي محمد عبدالله جان سایق، په داسې حال کې چې د کابل ولایت له پېښو سره د مبارزې آمادګۍ رئیس محترم مولوي نجیب الله انوري، هم شتون درلود، وویل: له پېښو سره د مبارزې آمادګۍ ملي ادارې سرپرست د محترم الحاج ملا نورالدین ترابي په لارښوونه، د بشري مرستو د وېش بهیر د زیانمنو او بېوزله کورنیو لپاره د هېواد په ۳۴ ولایتونو کې روان دی.
محترم سایق زیاته کړه چې نن د ۲۵۰ زیانمنو کورنیو، معلولینو او نابینایانو لپاره یوه بورۍ ۵۰ کیلویي اوړه، یوه بورۍ ۲۵ کیلويی وریجې، یو فامیلي کېټ او ۱۰ کلچې صابون ووېشل شول.
نوموړي د ژمي په موسم کې د پېښو یادونه وکړه او څرګنده یې کړه چې موږ په ټول هېواد کې د ژمي موسم احتمالي پېښو له امله ټولو زیانمنو ته د رسیدنې لپاره چمتو یو.
په پای کې د مرستو ترلاسه کوونکو له پېښو سره د مبارزې آمادګۍ ملي ادارې څخه د خوښۍ او مننې څرګندونې وکړې او د لا زیاتو مرستو غوښتنه یې وکړه.
نېټه: ۱۴۴۶/۵/۸
له پېښو سره د مبارزې آمادګۍ ملي اداره
