په سویلي سالنګ کې د واورې ښویېدو پر مهال د لټون، ژغورنې او لومړنیو مرستو عملي روزنیز پروګرام او مانور ترسره شو
له پېښو سره د مبارزې آمادګۍ ملي ادارې د هستوګنې لپاره د آغاخان بنسټ په همکارۍ، د طبیعي پېښو پر وړاندې د چمتووالي د کچې لوړولو او د کارکوونکو د وړتیا لوړولو په موخه، د واورې ښویېدو پر مهال د لټون او ژغورنې یو روزنیز–تمریني پروګرام، د دې ادارې د مرکزي او کاپیسا، پنجشېر، پروان ولایتونو ۴۰ تنه کارکوونکو او همدارنګه د سالنګونو د ساتنې او مراقبت ریاست د کاري ځواکونو لپاره د پروان ولایت په سویلي سالنګ کې ترسره کړ.
دی پروګرام د درې ورځو لپاره دوام وکړ. د پروګرام په لومړیو دوو ورځو کې، د تخنیکي او ژغورنې برخو استادانو او روزونکو د واورې ښویېدو د خطرونو پېژندنې، د فردي خوندیتوب طریقې، د لټون او ژغورنې اصول، په سمه توګه د ژغورنې وسایلو کارونې او د لومړنیو مرستو وړاندې کولو په اړه نظري زدهکړې ګډونوالو ته وړاندې کړې. د درېیمې ورځې په جریان کې، د سویلي سالنګ اړوند د ګوارهسنګ په سیمه کې عملي تمرینونه ترسره شول، تر څو ګډونوال خپلې نظري زدهکړې په عملي بڼه پلې کړي.
د عملي تمرینونو پر مهال، د واورې ښویېدو فرضي پېښې جوړې شوې او ګډونوال د واورو لاندې د بند پاتې کسانو د راایستلو، لېږدلو، بېړنیو لومړنیو مرستو، د ټیم همغږۍ او د پېښې د صحنې د مدیریت له طریقو سره په عملي ډول بلد شول. دا تمرینونه د سالنګ په لاره کې د مسؤلو ځواکونو د عملي مهارتونو په لوړولو کې مهم رول لري؛ هغه لاره چې هر کال د ژمي په موسم کې د سختو واورې ښویېدو او ناوړه پېښو شاهده وي.
همدارنګه، د دې روزنیز پروګرام ګډونوالو او د سالنګونو د ساتنې او مراقبت ریاست کاري ځواکونو دغه ډول روزنې اغېزمنې وبللې او غوښتنه یې وکړه چې دا ډول پروګرامونه دې د یادو ریاستونو د نورو کارکوونکو او کاري ځواکونو لپاره هم ترسره شي.
نېټه:۱۴۴۷/۷/۹ هـ ق
له پېښو سره د مبارزې آمادګۍ ملي اداره
