له پېښو سره د مبارزې آمادګۍ ملي ادارې سرپرست په لغمان ولایت کې په اجباري توګه د اېستل شوو کډوالو له پنډغالي څخه لیدنه وکړه
نن ورځ چهارشنبه د سهار په ۶:۰۰ بجې، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، له تورخم وروسته لغمان ولایت ته سفر وکړ او د لغمان ولایت له پېښو سره د مبارزې آمادګۍ له رئیس قاري خیرمحمد غازي سره یو ځای د قرغیي ولسوالۍ په سرخکان سیمه کې په اجباري توګه د اېستل شوو کډوالو له کمپ څخه لیدنه وکړه.
محترم ترابي صاحب، د سیمې د لیدنې پر مهال، د کډوالو ستونزې او هغوی ته لا په ښه توګه د رسیدنې په برخه کې د موجودو ننګونو په اړه د لغمان ولایت له پېښو سره د مبارزې آمادګۍ رئیس څخه معلومات ترلاسه کړل او ویې ویل چې اسلامي امارت د کډوالو چارو ته په ښه توګه د رسېدنې لپاره ژمن دی.
همداراز، نوموړي د شته ستونزو په درک کولو سره، د دې ترڅنګ چې یاد پنډغالي ته یې د ۵۰۰ کمپلو د انتقال ژمنه وکړه او په اجباري توګه اېستل شویو کډوالو ته په ښه توګه د رسیدنې لپاره یې یو څه نغدي مرستې هم د لغمان ولایت له پېښو سره د مبارزې آمادګۍ رئیس ته ورکړې.
په همدې حال کې، له پېښو سره د مبارزې آمادګۍ ملي ادارې سرپرست، له یو شمېر په اجباري توګه راستنېدونکو کسانو سره هم وکتل، د هغوی ستونزې یې واورېدې، له هغوی سره یې خواخوږۍ وښوده او هغوی یې صبر ته وهڅول.
نېټه: ۱۴۴۶/۱۰/۲۵ هـ ق
له پېښو سره د مبارزې آمادګۍ ملي اداره
