له پېښو سره د مبارزې آمادګۍ ملي ادارې سرپرست په تورخم کې د دې ادارې له پنډغالي ليدنه وکړه او د کارونو پر چټکتيا یې ټينګار وکړ
نن ورځ يکشنبه، له پېښو سره د مبارزې آمادګۍ ملي ادارې سرپرست الحاج ملا نورالدين ترابي، په تورخم کې د یادې ادارې د پنډغالي د جوړېدو لپاره د ټاکل شويو کمېټو د کاري بهير څخه ليدنه او څارنه وکړه.
د دې ليدنې پر مهال، ترابي صاحب د بېلابېلو برخو له مسؤلينو او کارکوونکو سره جلا جلا خبرې وکړې، د کارونو د پرمختګ او کيفيت په اړه يې معلومات تر لاسه کړل او د هغوی وړانديزونه او ستونزې يې واورېدې.
همداراز، نوموړي جلا جلا د خيمو د لګولو، د سړک د جغل اچولو، د تشنابونو او حمامونو د جوړولو او د نورو اړوندو برخو کتنه وکړه، فعاليتونه يې په کره ډول وڅېړل او د کارونو پر چټکتيا ټينګار يې وکړ.
د ادارې سرپرست، د دې څارنې پر مهال د کارکوونکو د هڅولو ترڅنګ، پر شفافيت او د چارو پر چټکتیا ټينګار وکړ او زياته يې کړه چې ټول اړين امکانات، لکه درمل او نور روغتیایي تجهيزات، بايد د دې ادارې په روغتون کې چې د MDC مؤسسې په همکارۍ جوړ شوی دی، برابر شي.
نېټه: ۱۴۴۶/۱۰/۲۳ هــ ق
له پېښو سره د مبارزې آمادګۍ ملي اداره
