له پېښو سره د مبارزې آمادګۍ ملي ادارې سرپرست په افغانستان کې د UN-OCHA له مرستیال سره وکتل

نن ورځ سې شنبه, له غرمې مخکې له پېښو سره د مبارزې آمادګۍ ملي ادارې سرپرست الحاج ملا نورالدین ترابي په خپل کاري دفتر کې د اوچا له مرستیال کينيت راجرز او د اړیکو له مسؤل شمس خلیلي سره وکتل.
ترابي صاحب د اوچا د دفتر راغلي پلاوي ته د ښه راغلاست ترڅنګ وویل, چې خوښ یو چې یو له بل سره همکاري کوو او موږ تل هڅې کوو چې د بېلابېلو سازمانونو او مؤسسو کارونه په چټکۍ سره خلاص کړو تر څو خلکو ته پر وخت مرسته ورسول شي او موږ په خپل اداره کې پوره شفافیت راوستلې دی.
همداراز ترابي صاحب د اوچا د راغلي پلاوي څخه غوښتنه وکړه چې, هغو ولایتونو لکه, پکتیکا، غزني، زابل، کندهار، ارزګان هلمند، فراه او نیمروز ولایتونو ته دې د مؤسساتو پاملرنه زیاته کړي ځکه چې دا ولایتونه مرستو ته جدي اړتیا لري. ترابي صاحب همدا راز وویل چې د بادغیس ولایت په دره بوم ولسوالۍ کې خلګ وچکالۍ ځپلي دي او اوبو ته هیڅ لاسرسی نه لري او که د اوبو رسونه ژر ورته ونشي ډېرې کورنۍ به بېځایه شي او باید یې پر وخت دغه ستونزه حل شي.
وروسته د اوچا دفتر مرستیال کينيت راجرز وویل چې له پېښو سره د مبارزې آمادګۍ ملي ادارې په کارونو کې چټکتیا روښانه ده او موږ له تاسو څخه مننه کوو چې کارونه مو په چټکۍ روان کړي دي ښاغلي همدارنګه څرګنده کړه چې د تېرو کلونو په پرتله به په راتلونکي کال کې د پېښو د مدیریت او بشري مرستو په برخه کې ډېره پاملرنه وشي.
همداراز یې وویل چې موږ به د واش کلسټر او نورو ټولو مؤسساتو سره له نږدې خبرې وکړو او د هغو ولایتونو په اړه چې مرستو ته جدي اړتیا لري او د بادغیس ولایت د دره بوم  ولسوالۍ پر موضوع خبرې ورسره وکړو او ستونزو ته به ژر رسېدنه وکړو.
په پای کې, د دواړو لورو لخوا ژمنه وشوه چې په ګډه به هغه ستونزې له منځه وړي چې خنډونه یی رامنځته کړې دي.

نېټه: ۱۴۴۶/۱۱/۲۹ هــ ق 
له پېښو سره دمبارزې امادګۍ ملي اداره