له پېښو سره د مبارزې آمادګۍ ملي ادارې سرپرست د کاتولیک نړیوالې خیریه مؤسسې له پلاوي سره وکتل

نن ورځ یک شنبه، له پېښو سره د مبارزې آمادګۍ ملي ادارې سرپرست الحاج ملا نورالدین ترابي، د کاتولیک نړیوالې خیریه مؤسسې له عمومي رئیسې اغلې مارګریت وډز، د یادې مؤسسې له مرستیالې اغلي برونوین مور او د کابل د دفتر مسؤل احمد فرید صمیمي سره په خپل کاري دفتر کې وکتل. 
ترابي صاحب د یادې موسسې پلاوي ته ښه راغلاست وویل او زیاته یې کړه، چې موږ هڅه کوو ترڅو خلکو ته د مرستې د رسونې په موخه د مؤسسو ستونزې په خپل وخت او بې له خنډه حل کړو.
همداراز ترابي صاحب زیاته کړه، چې موږ به هغه موضوعات وڅېړو چې یادې مؤسسې په دایکندي ولایت کې په کومو لاملونو خپل فعالیتونه بند کړي او په دې اړه له څېړنو وروسته لازمې پرېکړې ونیسو.
د کاتولیک نړیوالې خیریه مؤسسې رئیسې اغلې مارګریت وډز، د یادې ادارې له سرپرست څخه ځانګړې مننه وکړه او خوښي یې څرګنده کړه چې تل یې زموږ سره همکاري کړې ده او د فعالیتونو په ترسره کولو کې یې د کار پر شفافیت او چټکیتا ټینګار کړی دی.
نوموړې زیاته کړه چې موږ هڅه کوو ترڅو د خپل ډونر څخه زیاتې مرستې ترلاسه کړو او خلکو ته یې په شفاف ډول ورسوو.

نېټه: ۱۴۴۶/۱۱/۶ هــ ق
له پېښو سره د مبارزې آمادګۍ ملي اداره