له پېښو سره د مبارزې آمادګۍ ملي ادارې سرپرست د افغانستان لپاره د ناروی کمېټې له عمومي رئیس سره د ۷۰۹،۷۱۵ ډالرو په ارزښت د ګډو همکاریو تفاهم نامه لاسلیک کړه
نن ورځ (سهشنبه) له غرمې وروسته، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، د افغانستان لپاره د ناروی کمېټې له عمومي رئیس، تاریا مګنوسون واټرډال، د بشري مرستو د پروګرامونو مسئول ذبیحالله رحمتي، د اړیکو مسئول مجیبالله شیرزوی، او د تمویل کوونکو سره د اړیکو مسئول غفار رحمتي سره په خپل کاري دفتر کې وکتل او د ګډو همکاریو لپاره یې تفاهمنامه ورسره لاسلیک کړه.
له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، د ناروی کمېټې پلاوي ته د ښه راغلاست ترڅنګ وویل چې موسسې باید خپل کارونه په ځانګړي ډول د ژمنیو مرستو د وېش چارې ګړندۍ کړي، ترڅو خلک پر وخت ګټه ترې واخلي.
ترابي صاحب زیاته کړه چې هڅه کوو د موسسو کارونه ژر تر ژره ترسره کړو، ترڅو د افغانستان خلک د دوی له خدمتونو څخه برخمن شي. نوموړي وویل چې موږ هڅه کوو د ا.ا.ا د اصولو او چوکاټ په رڼا کې تل د موسسو سره لازمه همکاري وکړو.
ترابي صاحب دا هم وویل چې افغانستان د خپل جغرافیایي موقعیت له امله له بېلابېلو طبیعي پېښو سره مخ دی، او له ناروی کمېټې درئیس څخه یې وغوښتل چې د پېښو د خطرونو کمولو لپاره د وقایوي پروژو په پلي کولو کې دي هم له دې ادارې سره همکاري وکړي.
وروسته، د افغانستان لپاره د ناروی کمېټې عمومي رئیس، تاریا مګنوسون واټرډال، له پېښو سره د مبارزې آمادګۍ ملي ادارې سرپرست څخه د همکاریو له امله مننه وکړه او د دې کمېټې د بېلابېلو خدماتو په اړه یې معلومات وړاندې کړل. نوموړي ژمنه وکړه چې د پېښو د خطرونو په اړه د عامه پوهاوي برنامو ترسره کولو او د وقایوي پروژو پلي کولو په برخه کې به هم له پېښو سره د مبارزې آمادګۍ ملي ادارې سره همکاري وکړي.
ښاغلي واټرډال د دې موسسې د روانې پروژې په اړه معلومات وړاندې کړل، چې په دې پروژه کې د کابل ولایت په شکردره ولسوالۍ او د پکتیکا ولایت په برمل ولسوالۍ کې د ژمنیو مرستو او د زیانمنو کورنیو لپاره د سرپناه جوړولو چارې شاملې دي.
د یادونې وړ ده چې دا کمېټه به د ۷۰۹,۷۱۵ (۷۰۹ زره او ۷۱۵) ډالرو په ارزښت، د کابل ولایت په شکردره ولسوالۍ کی ۵۱۱ مستحقو کورنیو هرې یوې ته ۲۰۰ ډالر یا معادل یې په افغانیو کې، او د ۷۴ ډالرو په ارزښت ۵ تختې (یوه دوهکسیزه او څلور یوکسیزې) کمپلې ووېشي. همداراز، د پکتیکا ولایت په برمل ولسوالۍ می ۲۸۲ زیانمنو کورنیو ته به مرستې ویشل کېږي، په دې توګه، چې ۶۸ کورنیو ته به د دویم او درېیم قسط په توګه ۱۶۲۰ ډالر یا معادل یې په افغانیو کې ورکړل شي، او ۲۱۴ کورنیو ته به د دویم او دریم قسط په توګه ۱۳۱۰ ډالر یا معادل یې په افغانیو کې د کورونو د جوړولو لپاره ورکړل شي.
نېټه: ۱۴۴۶/۸/۱۹
له پېښو سره د مبارزې آمادګۍ ملي اداره
