له پېښو سره د مبارزې آمادګۍ ملي ادارې د GIS روزنیز پروګرام د دې ادارې او همکارو وزارتونو د تخنیکي کارکونکو لپاره ترسره کړ

له پېښو سره د مبارزې آمادګۍ ملي ادارې د آقاخان بنسټ په تخنیکي او مالي همکارۍ، د GIS روزنیز پروګرام د دې ادارې، د انرژۍ او اوبو وزارت، د فواید عامې وزارت، د ښار جوړونې او هستوګنې وزارت، د هوا پېژندنې ادارې او د چاپیریال ساتنې ملي ادارې اړوند ۳۰ تخنیکي کارکونکو لپاره د دې ادارې په انګړ کې ترسره کړ.
په دې روزنیز پروګرام کې، مولوي محمد عابد نعماني، د دې ادارې د کارکوونکو د چارو رئیس او قاري خوشحال زماني د بیړنیو عملیاتو رئیس هم ګډون وکړ. د دې پروګرام د پرانستلو پر مهال مولوي نعماني د زده‌کړو اهمیت او پر مسلکي کار یې د زده کړو پر اغیز ټینګار وکړ. هغه وویل چې په دې پروګرام کې ګډون د خلکو خدمت ګڼل کېږي او ګډونوال باید په منظم ډول په دې پروګرام کې برخه واخلي.
د یادونې وړ ده چې دا پروګرام د دې ادارې او همکارو وزارتونو د کارکونکو د وړتیا لوړولو په موخه د GIS او اړوندو پروګرامونو په برخه کې د درې ورځو لپاره جوړ شوی او د محترم محمد الیاس له لوري وړاندې کېږي.

نیټه: ۱۴۴۶/۵/۲۹
له پیښو سره د مبارزې آمادګۍ ملي اداره