له پېښو سره د مبارزې آمادګۍ ملي ادارې د کارکوونکو لپاره د کړنو د ارزونې لارښود پروګرام ترسره شو
له پېښو سره د مبارزې آمادګۍ ملي ادارې د کارکوونکو چارو ریاست د کارکوونکو د کړنو د ارزونې آمریت له لوري د اداري اصلاحاتو او ملکي خدمتونو کمېسیون سره په همغږۍ د کاري پلان، ارزونې فورمو او د کاري راپور د لارښود پروګرام، د یادې ادارې د رئیسانو، آمرینو او کارکوونکو لپاره د دې ادارې د کنفرانسونو په تالار کې ترسره کړ.
دا پروګرام د بیړنیو حالاتو د عملیاتو د مرکز رئیس قاري محمد خوشحال زمانی لخوا د قرانکریم د څو مبارکو آیتونو په تلاوت سره پیل شو.
په پیل کې د دې ادارې د کارکوونکو چارو رییس مولوي محمد عابد نعماني، ګډونوالو ته د دی پروګرام د معرفي او اهمیت په اړه خبرې وکړې. نوموړي د کاري راپور، کاري پلان او د کارکوونکو د ارزونې ترتیب د ملکي خدمتونو د کارکوونکو د چارو د اغېزمنتیا او ښه والي لپاره مهم وباله او زیاته یې کړه چې زموږ دنده د خلکو ښه خدمت کول ده، باید هڅه وکړو چې د منظم پلان له مخې، خپل فعالیتونه په ښه توګه خپاره کړو، ځکه چې موږ هر یو په خپله دنده کې مسئولیت لرو، او باید هڅې وکړو ترڅو دا مسؤلیت په ښه توګه ترسره کړو.
ورپسې د ملکي خدمتونو د کړنو، څارنې او ارزونې آمر احمد فواد حقبین، د دی پروګرام په اړه معلومات وړاندې کړل او ویې ویل: دا پروګرام د کاري پلان د جوړولو، ترتیب او د کارکوونکو د کاري راپور د وړاندې کولو د ټولو اړخونو په اړه دی، او له دې فرصته باید ښه ګټه واخیستل شي او د دې ترتیب او پلي کولو ته باید ښه پاملرنه وشي.
په پای کې، د ملکي خدمتونو د کړنو، څارنې او ارزونې کارپوه سمیع الدین صمیم، د کاري پلان د ترتیب او د راپور ورکولو په اړه ګډونوالو ته د پرېزنټېشن وړاندې کړ.
نېټه: ۴/ ۸/ ۱۴۴۶
له پېښو سره د مبارزې آمادګۍ ملي اداره
