د پنجشېر ولایت په رُخه ولسوالۍ کې د استنادي دیوال جوړولو د پروژې کار پرانیستل شو

له پېښو سره د مبارزې آمادګۍ ادارې او د کلیو د بیارغونې او پراختیا مؤسسې (ORDR) ترمنځ د لاسلیک شوي هوکړه‌لیک له مخې، د DAHW مؤسسې په مالي تمویل د پنجشېر ولایت له پېښو سره د مبارزې آمادګۍ ریاست د یادې مؤسسې په تخنیکي ملاتړ، د رُخه ولسوالۍ د قابضان کلي په سیمه کې د قدرتي پېښو د خطرونو د کمولو او د سیمې د اوسېدونکو د ځان، مال او شتمنیو د خونديتوب په موخه د شاوخوا ۱۰ متره په اوږدوالي د یوه استنادي دېوال جوړولو د پروژې کار د اړوندو مسؤلینو په شتون کې رسمآ پرانیست. 

دا پروژه د پنجشېر ولایت له پېښو سره د مبارزې آمادګۍ ریاست تر څارنې او همغږۍ لاندې، د DAHW مؤسسې په مالي ملاتړ او د کلیو د بیارغونې او پراختیا مؤسسې (ORDR) له لوري عملي کېږي.

د دې پروژې اساسي موخه د قابضان پل لاندې سیمه کې د لا زیاتو ویجاړیو مخنیوی، د استوګنیزو کورونو او کرنیزو ځمکو ساتنه او د طبیعي پېښو له امله د رامنځته کېدونکو خطرونو کمول دي، ترڅو د سیمې اوسېدونکي له احتمالي زیانونو څخه خوندي پاتې شي.

د پنجشېر ولایت له پېښو سره د مبارزې آمادګۍ ریاست مسؤلینو څرګنده کړه چې یاده پروژه د تثبیت شویو اړتیاوو او تخنیکي ارزونو د پایلو پر بنسټ طرحه شوې ده. د پروژې له بشپړېدو وروسته به د عامه او خصوصي شتمنیو د ساتنې زمینه لا پیاوړې شي او د قدرتي پېښو پر وړاندې د خلکو د زیان‌مننې کچه به په څرګند ډول راکمه شي.

نېټه:۱۴۴۷/۱۲/۲۹ هـ ق

له پېښو سره د مبارزې آمادګۍ اداره