د هرات ولایت له پېښو سره د مبارزې آمادګۍ ریاست په ادرسکن ولسوالۍ کې د دوو استنادي دېوالونو جوړولو د پروژې کار بشپړ او ګټې اخیستنې ته وسپارله
د هرات ولایت له پېښو سره د مبارزې آمادګۍ ریاست، د کډوالۍ نړیوال سازمان (IOM) په مالي او تخنیکي همکارۍ، د یاد ولایت په ادرسکن ولسوالۍ کې د استنادي دېوالونو دوه وقایوي پروژې په بریالیتوب سره بشپړې او ګټې اخیستنې ته وسپارلې.
په لومړۍ پروژه کې د ادرسکن ولسوالۍ په خرچان کلي کې د لس میلیونه او پنځه لکه (۱۰,۵۰۰,۰۰) افغانیو په لګښت له دواړو غاړو د ۱,۱۴۲ متره په اوږدوالي، ۲.۲ لوړوالي، د پاسنۍ برخې ۰.۶ متره پلنوالي او د لاندې برخې ۱.۴ متره په پلنوالي سره استنادي دیوال جوړ شو.
د پروژې د پلي کېدو پر مهال ۲۴ ماهرو او ۶۷ غیر ماهرو کارګرو لپاره د کار زمینه برابره شوه او په بشپړېدو سره یې له ۹۲۰ څخه زیاتې کورنۍ په مستقیم ډول ترې برخمنې شوې، همدارنګه په قارتي کلي کې د لس میلیونه او درې لکه او پنځوس زره (۱۰,۳۵۰,۰۰۰) افغانیو په لګښت د ۴۷۱ متره په اوږدوالي، د ۳.۳ متره په لوړوالي، د پاسنۍ برخې په ۰.۶ متره پلنوالي او د لاندې برخې په ۱.۴ متره پلنوالي سره استنادي دیوال جوړ شو، چې په دې پروژه کې د ۲۳ ماهرو او ۹۴ غیر ماهرو کارګرو لپاره د کار زمینه برابره شوې وه او له بشپړېدو وروسته یې له ۶۰۰ څخه زیاتې کورنۍ په مستقیم ډول ترې ګټه پورته کوي.
د هرات ولایت له پېښو سره د مبارزې آمادګۍ ریاست مسؤلینو وویل، د دغو پروژو موخه د سېلابونو د خطر کمول، د استوګنیزو سیمو او عامه تأسیساتو ساتنه، د قدرتي پېښو پر وړاندې د زیانمنو سیمو لپاره د خوندیتوب رامنځته کول دی.
د سیمې اوسېدونکو د پروژې له بشپړېدو هرکلی وکړ، او دا یې د هغوی ځان او مال د ساتنې په برخه کې یو مهم ګام وباله او له پېښو سره د مبارزې آمادګۍ ریاست او IOM سازمان څخه مننه او قدرداني وکړه.
