د میدان وردګ ولایت په نرخ ولسوالۍ کې د ۳۵۰ متره اوږد خوړ د پاکولو کار بشپړ او ګټې اخیستنې ته وسپارل شو
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي په لارښوونه، د میدان وردګ ولایت له پېښو سره د مبارزې آمادګۍ ریاست، د یاد ولایت د نرخ ولسوالۍ د عمرخیل په سیمه کې د ۳۵۰ متره په اوږدوالي د عثمان خوړ د پاکولو کار بشپړ کړ او رسماً یې ګټې اخیستنې ته وسپاره.
.
یاده پروژه، چې څه موده وړاندې د سیمې د اوسېدونکو د ستونزو د هواري او د سېلابونو د خطر د کمولو په موخه پیل شوې وه، د میدان وردګ ولایت له پېښو سره د مبارزې آمادګۍ ریاست تر مستقیمې څارنې لاندې پلي شوه.
د یادې پروژې د پلي کېدو په موخه، له پېښو سره د مبارزې آمادګۍ ادارې له بودجې څخه د ماشینرۍ د کرایې لپاره نوي زره (۹۰,۰۰۰) افغانۍ منظور شوې وې.
د دغې پروژې په بشپړېدو سره، د عمرخیل سیمې د اوسېدونکو کورونه، کرنیزې ځمکې او حاصلات د احتمالي سېلابونو له ګواښ څخه خوندي شول او د سیمې د خلکو اندېښنې تر ډېره بریده راکمې شوې. همدارنګه، د سیند د لارې پاکول به د اوبو د منظم جریان، د چاپېریال د ساتنې او د راتلونکو طبیعي پېښو د خطر د کمولو په برخه کې مهم رول ولوبوي.
د میدان وردګ ولایت له پېښو سره د مبارزې آمادګۍ ریاست رئیس، مولوي احمد شاه ذهین، د ولایت اوسېدونکو ته ډاډ ورکړ چې د وقایوي پروژو د پلي کولو لړۍ به د ولایت په کچه په منظم ډول دوام ولري او د خلکو ستونزو او اړتیاوو ته به پر وخت رسېدنه وشي.
