د ماین پاکۍ د ۱۲ متخصصینو لپاره د مهماتو د تخریب پرمختللی کورس په بریالیتوب سره پای ته ورسېد
د مهماتو د تخریب پرمختللی کورس (دریمه لوړه کچه) د DRC ماین پاکۍ مؤسسې په غوښتنه او د ARTIOS نړیوال شرکت په تطبیق سره، د درېیو اوونیو لپاره د کابل ولایت د پغمان ولسوالۍ په روزنیز مرکز کې ترسره شو او په بریالیتوب سره پای ته ورسېد.
د دې روزنیز پروګرام په وروستۍ ورځ، ګډونوالو د کنټرول شویو چاودنو (CDS) له لارې د چاودېدونکو توکو د تخریب عملي زدهکړې ترلاسه کړې. په دغو عملي تمرینونو کې د DRC مؤسسې ۱۰ کارکوونکو او د Halo Trust مؤسسې ۲ کارکوونکو فعاله ونډه لرله. یاد تمرینونه د کابل ولایت د دهسبز ولسوالۍ په سیمه کې د هیلو ټرسټ مؤسسې اړوند د مهماتو د تخریب په ساحه کې د امنیتي برخو، د ماین پاکۍ د انسجام او همغږۍ ریاست او د نشراتو ریاست د استازو په شتون کې ترسره شول.
د دغه کورس په بریالۍ بشپړېدو سره، ۱۲ د ماین پاکۍ متخصصینو د لویو مهماتو د کنټرول شویو چاودنو د ترسره کولو، د ناچاوده توکو د خوندي ویجاړولو او د بېلابېلو هوايي بمونو د شنډولو په برخو کې اړینې وړتیاوې او مهارتونه ترلاسه کړل، چې دا د هېواد د ماین پاکۍ سکتور د تخنیکي او عملیاتي ظرفیتونو د لوړولو په برخه کې یو مهم او اغېزناک ګام بلل کېږي.
د یادونې وړ ده چې د دې پروګرام په جریان کې ګډونوالو خپلې تجربې او نظریات شریک کړل او د کورس روزنیز محتوا او عملي تمرینونه یې ګټور او اغېزناک وبلل.
په پای کې د ګډونوالو، روزونکو او همکارو بنسټونو له اغېزناکو هڅو او همکاریو څخه مننه او قدرداني وشوه او د ماین پاکۍ د کارکوونکو د مسلکي ظرفیتونو د لا لوړولو لپاره د تخصصي روزنیزو پروګرامونو پر دوام ټینګار وشو.
نېټه:۱۴۴۸/۱/۰۲ هـ ق
له پېښو سره د مبارزې آمادګۍ اداره
