د دایکندي ولایت له پېښو سره د مبارزې آمادګۍ ریاست له بوم سیوک څخه تر بوم رازي پورې د سړک د ترمیم او پراخولو کار پیل کړ

له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي، د لارښوونې پر بنسټ، د دایکندي ولایت له پېښو سره د مبارزې آمادګۍ ریاست له بوم سیوک څخه تر بوم رازي پورې د سړک د ترمیم او پراخولو د پروژې عملي کار پیل کړ.

دا پروژه د ۳ کیلومتره په اوږدوالي او د درې لکه او نوي زره (۳۹۰,۰۰۰) افغانیو په ټولیز لګښت پلي کېږي. د دې پروژې په چوکاټ کې، د دایکنډي ولایت له پېښو سره د مبارزې آمادګۍ ریاست له لوري یوه عراده اسکواټور ماشین د سړک د ترمیم او پراخولو د چارو د ترسره کولو لپاره په کار لګول شوی دی.

یاد سړک د ولایت د مرکز د سیوک شیبر کلي د خدیر ولسوالۍ له ویرمنا، مشنوک، بوم رازي او رباط کلیو سره نښلوي. د دې پروژې په بشپړېدو سره به د سیمې د اوسېدونکو د تګ راتګ واټن لنډ شي، د واورې ښوېدنې له امله رامنځته کېدونکي خطرونه به راکم شي او د خلکو د تګ راتګ او خدمتونو ته د لاسرسي په برخه کې به لا ډېرې اسانتیاوې برابرې شي.
د یادو سیمو اوسېدونکو د دې پروژې له پیل څخه هرکلی وکړ او د عامه المنفعه پروژو د پلي کېدو او د قدرتي پېښو د خطرونو د کمولو په برخه کې یې د دایکندي ولایت له پېښو سره د مبارزې آمادګۍ ریاست له هڅو او خدمتونو څخه مننه او قدرداني وکړه.