د بدخشان ولایت له پېښو سره د مبارزې آمادګۍ ریاست په ارګو ولسوالۍ کې د استنادي دېوال د جوړولو کار پیل کړ
د بدخشان ولایت له پېښو سره د مبارزې آمادګۍ ریاست د ارګو ولسوالۍ په تاقلک کلي کې د سېلابونو د خطرونو او د ځاني او مالي زیانونو د مخنیوي په موخه د استنادي دېوال جوړولو د پروژې د بنسټ ډبره د یو شمېر سیمه ییزو مسؤلینو په شتون کې کېښوده.
دا پروژه د عالیقدر امیرالمؤمنین حفظ الله د حکم پر بنسټ، د هېواد له پېښو سره د مبارزې آمادګۍ ملي ادارې له لوري تمویل او پلې کېږي.
د یادونې وړ ده، چې له پېښو سره د مبارزې آمادګۍ ملي ادارې د انجنیرانو لخوا په تاقلک کلي کې د زیانمنونکو سیمو سروې ترسره شوې وه، چې یاده سیمه د سېلابونو له خطر سره مخ پېژندل شوې وه او اوس مهال د یو میلیون او یو سل او اتیا زرو (١،١٨٠،٠٠٠) افغانیو په ارزښت په یاد کلي کې د استنادي دېوال جوړولو د پروژې کار عملآ پیل شو.
د یادونې وړ ده، چې د سیمې خلکو له دې پروژې څخه خوښي څرګنده کړه او د نظام د بقا او ثبات لپاره یې دعا وکړه.
نېټه: ۱۴۴۷/٣/٢٨ هـ ق
له پېښو سره د مبارزې آمادګۍ ملي اداره
