د افغانستان ولایتي شورا ګانو د همغږۍ شورا رییس سره پېښو ته د رسیدو په چارو کې د دولت وزیر لیدنه
ښاغلي بهاوالدین جیلانی پېښو ته د رسیدو په چارو کې د دولت وزیر په خپل کاري دفتر کې له عطا محمد حق بیان د افغانستان ولایتي شورا ګانو د همغږۍ شورا رییس او یو شمیر ولایتي رییسانو سره لیدنه او خبرې وکړې.
په دغه لیدنه کې دواړو خواوو د پېښو څخه زیانمن شوو ته د رسیدو او د پېښو خطرونو د کمولو لپاره د لا ډیرې همغږۍ او همکارۍ په پار بحث او نظر تبادله وکړه.
ښاغلي عطا محمد حق بیان د هیواد ولایتي شورا ګانو د همغږۍ شورا رییس ښاغلي غلام بهاوالدین جیلانی ته د نوي مسئولیت په مبارکۍ سره وویل: نن زموږ هېواد د جنګ او ګډوډۍ ترڅنګ د طبیعي پېښو له پیښیدو څخه په جدي توګه ځوریږي. د ولایتي شورا ګانو د همغږۍ شورا رییس پېښو ته د رسیدو په چارو کې د دولت وزیر څخه له پیښو زیانمن شوو ته د زیاتو مرستو لیږدولو او وقایوي پروګرامونو د پلي کېدو غوښتونکۍ شو.
ورته مهال ښاغلي بهاوالدین جیلانی پېښو ته د رسیدو په چارو کې د دولت وزیر د ښه راغلاست او د هېواد په کچه د ولایتي شوراګانو له کړنو او فعالیتونو څخه په ستاینې او په خاصه توګه زیانمن شوو ته د مرستو رسولو څخه اغیزناکې څارني تعریف وکړ او د هیواد ولایتي شورا ګانو د همغږۍ شورا رییس سره یې د لاډېرو همکاریو ژمنه وکړه.
